О́ńirlik jospardy halyqqa tanystyrý, Jumysshy mamandyqtar jylyna oraı atqarylatyn sharýalardy jarııalaý maqsatynda qala ákiminiń orynbasary Sársen Quranbektiń tóraǵalyǵymen alqaly jıyn ótti. Keleli keńeske zııaly qaýym ókilderi, joǵary, arnaýly oqý oryndarynyń basshylary, jastar qatysty. S.Quranbek bıylǵy ataýly jyly qolǵa alynatyn josparlar men atqarylatyn is-sharalardy málim etti.
Jumysshy mamandyqtary jyly – Prezıdenttiń saılaýaldy baǵdarlamasymen úndesetin bastama. Memleket basshysynyń ıdeıasymen «Adal azamat», «Ádiletti Qazaqstan» tujyrymdamalary iske asyp jatyr. Qarapaıym jumysshylardyń eńbegi qashan da adal, jumysshy adamdar taza eńbekpen nan tapqysy keledi, barlyq jerde ádilettiliktiń bolǵanyn qalaıdy. Sol turǵyda jumysshy mamandyqtarynyń qadirin arttyrýymyz kerek. Bul jumystar megapolıste ótken jyldan bastap qolǵa alyndy. Shahardaǵy 40 kolledjdiń dırektorlarymen bolǵan basqosýda suranysqa ıe mamandyqtardy daıarlaý máselesin talqyladyq. Qalada suranysqa ıe mamandyqtar jeterlik. Máselen, Shymkentte teatrlar, basqa da mádenı nysandardyń sany jıyrmadan asady. Olarǵa dekorator, taǵy sol sekildi jumysshy mamandar óte kerek. Burynǵy qyzmetkerlerdiń aldy qazir zeınet jasyna taıap qaldy. Kolledjder bıyl lısenzııa alyp, osy mamandyqtardy oqyta bastaıdy. Qalada 50 myńǵa jýyq jas kolledjde oqıdy. Byltyr 11 500 grant bólindi. Onyń kópshiligi, 67%-y jumysshy mamandyqtaryna berildi. Osy másele jóninde kásipkerlermen de jıyn ótkizdik. Kásipkerlik, bıznes ókilderi keıbir qajetti mamandardy syrttan ákeletinin aıtady. Jumysshy mamandyqtary jyly – qoǵamdaǵy osy túıtkildi sheshýdiń mańyzdy bir tetigi, der kezinde qolǵa alynǵan bastama. Bıylǵy is-sharalar jospary aıasynda bilim uıalarynda jumysshy mamandyqtarǵa baýlıtyn kabınetter ashyp, úzdik eńbekkerlerdi oqýshy, stýdentterge nasıhattaıtyn bolamyz. Sondaı-aq halyqaralyq deńgeıde 2 memorandým jasasyp, álemniń ozyq tájirıbelerin ózimizge engizemiz. 1410 stýdent jumys berýshi ótinishimen jumysqa ornalasady. Búginde qaladaǵy 9 joǵary oqý ornynda 82 myńnan astam stýdent bilim alyp jatyr. 1 qyrkúıekten bastap bakalavrıatta oqıtyn stýdentter shákirtaqysy 20%, magıstrant, doktoranttar stıpendııasy 15% óspek. Sonymen birge áleýmettik osal toptarǵa da kóptegen jeńildikter qarastyrylady. Aıtalyq, jańa oqý jylynda jetim, ata-anasynyń qamqorlyǵynsyz qalǵan stýdentterge shákirtaqy 30%, múgedektigi bar jandarǵa 50% kóbeıtiledi», dedi S.Quranbek.
Shymkenttegi JOO-da shetelden, elimizdiń túkpir-túkpirinen stýdentter kelip oqıdy. Sondyqtan jataqhanamen qamtamasyz etý – kún tártibinde turǵan máseleniń biri. Shahardaǵy jataqhanalar syıymdylyǵy 10 myńnan astam oryndy qurap, stýdentter úıine baılanysty tapshylyq qazirde aıtarlyqtaı problema týyndatyp turǵan joq. Degenmen qala ákimdiginiń josparyna sáıkes 2025–2029 jyldary 5 myń orynǵa arnalǵan jańa jataqhanalar salynady.
Qala ákiminiń orynbasary Biryńǵaı erikti jınaqtaýshy júıesiniń paıdasy, tıimdiligi týraly da aıtyp berdi. Onyń eń birinshi artyqshylyǵy, jastarǵa bilim alýǵa nemese bolashaqta baspana salýǵa qarajat qory bolady. Ári qarajat jınaǵan jastarǵa qarjylyq saýattylyqty arttyrýǵa múmkindik beredi. Qazirgi tańda kópshilik ata-ana balalaryn qaı mamandyqqa grant kóp, soǵan túsýge májbúrleıdi. Biryńǵaı erikti jınaqtaýshy júıe jastardyń júrek qalaýymen mamandyq tańdaýyna kómektesedi. Tipti osy qor arqyly jastar shetelde de bilim ala alady. S.Quranbek osy tyń bastamany ata-analarǵa tanystyryp, jan-jaqty úgit-nasıhat júrgizýge shaqyrdy.
Elý myńǵa jýyq kolledj stýdentiniń 30%-y byltyr oqý bitirgen. Sol túlekterdiń kóbisi, shamamen 80%-y jumysqa ornalasty. Bul eldegi eń joǵary kórsetkish bop esepteledi. Sondaı-aq arnaýly oqý ornyna túsetin stýdentterdiń sany da birshama artqan. Byltyr 49 200 bala kolledjde bilim alsa, bıylǵy oqý jylynda oqýǵa túsken talapkerler sany 49 780-di quraǵan. Bul da bolsa óńirde jumysshy mamandyqtarǵa qyzyǵýshylyqtyń artyp kele jatqanyn kórsetedi.
ShYMKENT
