Sýret «Egemen Qazaqstannyń» arhıvinen alyndy
Kóktemgi tasqynnyń saldarynan 3,9 myń turǵyn úı, 100-den astam kásipkerlik sýbektisi, 5 bilim berý nysany sýǵa ketti. Shyǵyndy qalpyna keltirýge barlyǵy 87 mlrd teńge bıýdjetten, túrli qorlardan demeýshilik qarajat bólindi. Onyń ishinde Prezıdent Q.Toqaevtyń bastamasymen elimizdiń asa iri kompanııalary men qorlary 63 mlrd teńge demeýshilik jasady.
Petropavl qalasynda «Birlik» atty shaǵyn aýdan boı kóterip, 700 turǵyn úı salyndy, sonymen birge 1394 páter satyp alyndy. 1899 úı qalpyna keltirildi. Barlyq turǵyndarǵa Úkimet belgilegen kólemde ótemaqy tólendi.
Qazir sý buzyp ketken dambalardy, qurylystardy, gıdrotehnıkalyq jaraqtardy qalpyna keltirý jumystary qarqyndy júrgizilip jatyr. Bıylǵy qarǵyn sýdyń da qaýipti bolatyn túri bar. Mamandardyń aıtýynsha, Esil ózeniniń deńgeıi qalyptaǵydaı túspedi, onyń ústine jerasty sýlary kóterilgen, qardyń kólemi de az emes. Sondyqtan oblys barlyq múmkindikterdi paıdalanyp, byltyrǵydaı topan sýǵa jol bermeýdiń qamyn jasap jatyr.
О́tken jyly ekonomıkanyń barlyq salalary, onyń ishinde aýyl sharýashylyǵy 140, ónerkásip 103,3, qurylys 131,4, saýda 109,6 kólik 124,1% ósimge qol jetkizdi. Egin sharýashylyǵynda 6,2 mln tonna astyq jınalyp, rekordtyq kórsetkish tirkeldi. Mal sharýashylyǵynda 17 taýarly-sút kesheni iske qosyldy.
Oblys ekonomıkasyn saraptaǵan mamandar aımaqtyq jalpy ónim (AJО́) quramynda ónerkásip ónimderiniń jyl saıyn ósip kele jatqanyn aıtady. Mysaly, onyń úlesi AJО́ kóleminde 2022 jyly – 16 paıyz, 2023 jyly 19 paıyz bolsa, byltyr tipti artty. Bul – ekonomıkany ártaraptandyrýdyń naqty kórinisi. Bir jyldyń ózinde ǵana panelder shyǵaratyn «Nord Panels», maı ekstraksııalaıtyn «Maslo-Del» zaýyty, kebekti bólshekteıtin «BioOperations» sehy, «Qyzyljar joldary kz» asfalt zaýyty iske qosyldy.
Ekonomıkaǵa quıylǵan ınvestısııa jospary tolyq oryndalyp, 556 mlrd teńge boldy. Bir jylda 1002 shaqyrym jol jóndeldi, onyń 208 shaqyrymy respýblıkalyq mańyzy bar, 630 shaqyrymy jergilikti mańyzy bar joldar. Eldi mekenderdiń 164 shaqyrymdyq ishki joldary jóndeldi. Qazir oblys joldarynyń 84%-y jaqsy, qanaǵattanarlyq jaǵdaıda dep baǵalanyp otyr.
О́tken jyly 281 shaqyrymdyq sý qubyryn tartýdyń arqasynda soltústikqazaqstandyqtardyń 97,5%-y taza aýyzsýǵa qol jetkizdi. Sonymen qatar 1,5 myń shaqyrym elektr júıeleriniń symdary men 10,5 shaqyrym jylý júıeleriniń qubyrlary jańalandy.
Turǵyn úı qurylysy da oblysta qarqyn alyp keledi. Byltyr 7 myńnan artyq otbasy jańa turǵyn úıge qol jetkizdi. 17 kópqabatty úılerdiń qurylysy aıaqtaldy, 1200 oryndyq bir jataqhana paıdalanýǵa berildi.
Oblys bıýdjetiniń kiris bóligi aldyńǵy jyldan 6,2%-ǵa artyp, 127,1 mlrd teńgege jetti. Shyǵys bóligi de belgilegen jospar sheńberinde oryndaldy. Bıylǵy josparlar arasynda jańa jumys oryndaryn qurý, jumyssyzdyqty, ataýly áleýmettik kómek alýshylardyń úlesin azaıtý jónindegi jumysty jalǵastyrý basym baǵyttar retinde belgilengen.
Memleket basshysynyń aýyl sharýashylyǵy ónimin eki jylda eki esege arttyrý jónindegi mindetin oryndaýda SQO kósh bastap keledi. 2023 jyly barlyq aýyl sharýashylyǵy óniminiń ındeksi 756 mlrd teńge bolsa, 2024 jyly 936 mlrd teńgege artty. 2025 jyldyń kóktemgi egis jumystaryna daıyndyq qalypty, búginge deıin 470 myń tonna tuqym quıyldy.
О́nerkásip salasynda «Radýga» kompanııasy «TehnoEkoPark» qurý ınvestısııalyq jobasyn iske asyrady. Jańa jobalardyń qolǵa alynýyna oraı «Qyzyljar» arnaıy ekonomıkalyq jáne ındýstrıaldyq aımaǵy 150 gektarǵa ulǵaıtyldy. Onda «Ýltradekor», «IKEA» kompanııalary aǵash óńdeý, jıhaz jasaý sehtaryn ashpaqshy. Reseılik «Beıkerton» kompanııasy kondıterlik buıymdar, Qytaıdyń aýylsharýashylyq jaraqtaryn shyǵaratyn kompanııasy traktorlar men tirkemeler qurastyrý sehyn ashý jobalaryn qolǵa alyp jatyr.
Soltústik Qazaqstan oblysy
