Sońǵy qysqy Azıada osydan jeti jyl buryn Japonııanyń Sapporosynda ótken edi. Sol jarysta bıatlonshylar 6 altyn, 4 kúmis, 2 qolany oljalap, aıdy aspanǵa bir-aq shyǵardy. Osy joly da dál sol sport túri ókilderiniń jolyna úlken úmitpen qarap otyrmyz. Qytaıda 10 jerlesimiz óner kórsetedi. Solardyń arasynan Dúnıejúzilik ýnıversıadanyń jeńimpazy Vadım Kýrales, atalǵan jarysta eki retten jeńis tuǵyryna kóterilgen Aleksandr Mýhın men Áset Dúısenovtiń áleýeti asa joǵary baǵalanady. Komanda sapynda kezinde Azııa oıyndarynda altynnan alqa taqqan Olga Poltoranına men Darıa Klımına syndy ataqtary alysqa jaıylǵan ardagerler de bar.
Elimiz Azıadaǵa qatysqan kezden beri óreli ónerimen óz jankúıerlerin qýantyp kelgen shańǵyshylar ekeni sózsiz. Alaıda Japonııada olar tym súreńsiz óner kórsetti. Sapporodaǵy sátsizdiktiń «kezdeısoqtyq» ekenin dáleldeý úshin 12 sportshymyz Harbınge attandy. Olar – Nadejda Stepashkına, Darıa Rıajko, Kamıla Elǵazınova, Ksenııa Shalygına, Angelına Shýryga, Marııa Lıýft, Ilııas Isabek, Naıl Bashmakov, Ernar Nurysbekov, Oljas Klımın, Vladıslav Kovalev, Konstantın Borsov. Osylardyń arasynan keminde eki-úsheýiniń bas júldege talasýǵa qaýqary jetedi.
Bilikti bapker Mádiǵalı Qarsybekovtiń eńbekqorlyǵy men tabandylyǵynyń arqasynda elimizdiń short-tregi zor bıikke kóterildi. Búginde kúlli álem bizdiń órendermen sanasady. Harbınde Denıs Nıkısha, Abzal, Alına Ájǵalıevter, Ádil Ǵalıahmetov, Iаna Han bastaǵan 12 sańlaq jarys jolyna shyǵady. Joǵaryda esimderi atalǵan sportshylardyń barlyǵy da talaı dúbirli dodada daralanǵan. D.Nıkısha Olımpııa oıyndarynda jeńis tuǵyryna synyq súıem qalǵanda súrinse, byltyr Rotterdamda uıymdastyrylǵan álem chempıonatynda kúmis medaldi moınynda jarqyratty. О́zge short-trekshiler Álem kýboginiń kezeńdik saıystarynda oljaǵa keneldi. Sol sebepti de aldaǵy jarystan jerlesterimizdiń qorjyny bos qaıtpaıtynyna senimdimiz.
Konkıshiler saıysynda Nadejda Morozova, Altaı Járdembekuly, apaly-sińlili Shýmekovalar óz jankúıerlerin qýantýǵa tıis. Mánerlep syrǵanaýda Mıhaıl Shaıdorov bar. Jastar arasyndaǵy álem chempıonatynyń kúmis júldegeri degen ataǵy bar 20 jastaǵy almatylyq óren búgingi tańda eresekter dýynda da eleýli tabysqa qol jetkizip júr. Mıhaıldyń myqtylyǵyn moıyndatyp, naǵyz erleıtin tusy osy. Sofıa Samodelkınaǵa da senim artylyp otyr. Byltyr ǵana elimizdiń azamattyǵyn alǵan 17 jastaǵy reseılik legıoner jýyrda ǵana Týrınde ótken Dúnıejúzilik Ýnıversıadada qola medaldi qorjynǵa saldy. Bul – Sofıa babynda degen sóz. Shaıdorov pen Samodelkınadan bólek, Dıas Jırenbaev, Sofııa Farafonova, Baısangýr Datıev, Gaýhar Naýryzova syndy tól túlekterimiz muz aıdynyna shyǵady.
Elimiz osyǵan deıin Azııa oıyndaryna alty ret qatysty. Sol jarystardyń barlyǵynan shaıbaly hokkeıshilerimiz oljaly oraldy. 1996, 1999, 2011, 2017 jyldary bas júldeni qanjyǵaǵa baılasaq, 2003, 2007 jyldary kúmispen kúpteldik. Harbınde QHL-da kúsh synasyp júrgen Andreı Shýtov, Temirlan Gaıtamırov, Danıl Býtenko, Ádil Beketaev, Samat Danııar, Artem Korolev, Roman Starchenko, Kırıll Savıskıı, Álıhan О́mirbekov, Kırıll Panıýkov, Rýslan Ospanov syndy «Barystyń» 11 saıypqyranynan bólek, Reseı men elimizdiń chempıonattarynda baq synap júrgen oıynshylar óner kórsetedi. Jigitterden tek altyn kútemiz. Osy sport túrin serik etken burymdylarymyz da osal emes. Buǵan deıingi Azıadada qyzdarymyz 3 altyn, 3 qola ıelendi. Bul joly da bas júldeni oljalaýǵa barynsha kúsh salýymyz kerek. Sondaı-aq sportshylarymyz taý shańǵysy, kerlıng, skı-alpınızm, frıstaıl-akrobatıkadan ótetin básekelerde baq synaıdy.
Jýyrda Úkimettiń otyrysynda Týrızm jáne sport mınıstri Erbol Myrzabosynov Harbınde jalaýy jelbireıtin asa jaýapty jarysqa sapaly daıyndalý maqsatynda joǵaryda atalǵan sport túrlerinen ulttyq qurama komandalarymyz 137 oqý-jattyǵý jıynyna qatysqanyn, sportshylardyń sheberligin shyńdaý úshin Nıderland, Polsha, Slovenııa, Belarýs, Reseıden arnaıy shaqyrylǵan keńesshi-bapkerlerdiń kómegine júgingenderin, daıyndyq joǵary deńgeıde ótkenin tilge tıek etti. Olaı bolsa, aldaǵy qysqy Azıadada elimizdiń órenderi úzdikter sanatynan kórinýge tıis.
- Azıadaǵa eń kóp sportshylar Astana qalasynan qatysady. Harbınge attanǵan elordalyqtardyń sany – 37. О́zge óńirlerden baq synaıtyn órenderimizdiń sany: Almaty qalasy – 27, Shyǵys Qazaqstan – 18, Aqmola – 17, Qostanaı – 9, Soltústik Qazaqstan – 7, Shymkent – 6, Pavlodar – 4, Almaty oblysy – 3, Qaraǵandy – 3, Abaı – 3, Mańǵystaý – 2, Jetisý – 1, Batys Qazaqstan – 1.
- Bıylǵy Azııa oıyndaryna Túrkistan, Ulytaý, Jambyl, Qyzylorda, Aqtóbe, Atyraý oblystarynyń birde-bir ókili qatyspaıdy.
- Qytaıǵa attanǵan sańlaqtardyń keıbireýi buǵan deıingi Azıadada jeńis tuǵyrynyń eń bıik satysyna kóterilgen. Máselen, 2011 jyly Astana men Almatyda alaýy tutanǵan alamanda Olga Poltoranına (bıatlon), Evgenıı Rymarev, Roman Starchenko, Tatıana Korolıova (shaıbaly hokkeı) altyn medaldi ıelense, 2017 jyly Sapporoda Darıa Klımına (bıatlon), Kırıll Savıskıı, Ivan Stepanenko, Dmıtrıı Grens (shaıbaly hokkeı) dál sol mejeden kórindi.
- Osyǵan deıingi Azııa oıyndarynda myna sportshylar júldegerler sanatyna qosyldy: Abzal Ájǵalıev (Astana-Almaty, 2011 jyl – qola, short-trek), Olga Tıhonova, Mádına Janbosynova (Sapporo, 2017 jyl – qola, short-trek, aralas estafeta), Arına Shıokolova, Mádına Tursynova, Malıka Aldabergenova, Pernesh Áshimova, Tatıana Korolıova (Sapporo, 2017 jyl – qola, shaıbaly hokkeı), Darıa Klımına (Sapporo, 2017 jyl – 2 qola medal, bıatlon).
- Elimiz quramasy sapyndaǵy eń qart sportshy – Denıs Vlasov. Skı-alpınızmdi serik etken sańlaqtyń jasy 41-de. Eń jas óren – Sofııa Zýbkova. Shaıbaly hokkeıden saıysqa túskeli jatqan boıjetkenniń jasy 17-de.
