«Arnaýly avtobaza» JShS-nyń menedjeri Oleg Iаnýshkonyń aıtýynsha, jańa keshen Ispanııanyń «IMABE Innovaciones» kompanııasynyń zamanaýı tehnologııasymen jabdyqtalǵan. Keshenniń jyldyq qýaty – 150 myń tonna qoqys suryptaý. Qazir kúnine 100 tonna qoqys suryptalyp jatyr. Onyń ishinde karton men makýlatýra, PET materıaldary, alıýmınıı, polıetılen, plastıkten jasalǵan buıymdar qaldyǵy bar.
«Keshenge ákelingen qoqys aldymen bastapqy suryptaýdan ótkiziledi. Munda suryptaý jelisinde keptelip qalýy múmkin materıaldar tańdalady. Keıin barlyǵy iri kólemdi suryptaý aýmaǵyna jiberiledi. Onda iri kólemdi qoqystardyń qaıta óńdeýge jaramdysy irikteledi. Kelesi, «elekten ótkizý» kezeńinde qoqystyń eń usaq bólikteri alynady. Odan keıingi kabınada jumysshylar materıaldardy plastık, metall, karton ne qaǵazǵa bólip suryptaıdy. Sońǵysy – qoqysty býyp-túıý», deıdi O.Iаnýshko.
Keshende jelide qoqysty býyp-túıetin arnaıy jeli bar. Onda dál qazir suryptaýǵa jatpaıtyn qaldyqtar býylyp-túıiledi. Suryptaýdan ótken daıyn qoqystar arnaıy óńdeý oryndaryna jiberiledi.
Atyraý oblysy
