Aqtaýda órtengen ushaq

Burnaǵy kúni Astana qalasynan kezekti reısin jasap, Aqtaý topyraǵyna taban tiregen «SCAT» áýe kompanııasynyń «Boıng» ushaǵynda órt shyqty. Astanadan kestege saı ushyp, kes­tege saı Aqtaý áýejaıyna qonǵan ushaqtan eshqandaı tehnıkalyq aqaýlar baıqalmaǵan. Abyroı bol­­­ǵanda, salonnan órt shyqqan sátte ushaq bortyndaǵy jolaýshylar jerge túsip bolǵan eken. Derekter órt atalmysh ushaqty kezekti «Mıneralnye vody» baǵytynda saparǵa shyǵarý úshin daıyndap, tehnıkalyq qyzmet kórsetý jumystary júrgizilip jatqanda tutanǵandyǵyn aıtady. Sonymen qatar, Aqtaý halyqaralyq áýejaıy órt sóndirýshileri der kezinde sóndirgen órt ushaq bortynda ottegi ballony jarylý sebebinen paıda boldy degen boljam aıtylýda. – Jolaýshylar ushaqtan kestege saı túsirilgen soń, onda tehnıkalyq qyzmet kórsetý jumystary bastal­dy. Osy kezde salonda órt tutan­dy. Avıakompanııa onyń sebebin anyq­taıtyn bolady, – deıdi kompanııanyń jurtshylyqpen baılanys bóliminiń jetekshisi Vıktorııa Ýlıanova. Qazirgi tańda oqıǵa ornynda arnaýly avıasııalyq komıtet jumys ja­saýda, sondaı-aq, «SCAT» áýe kom­panııasynyń ushaǵynyń órtke oranýy boıynsha sotqa deıingi tergeý jumystary bastalǵan. Ǵalamtor derekterinde Áýe kóligi halyqaralyq qaýymdastyǵy (IATA) «SCAT» áýe kompanııasynyń qyzmetin álemdegi eń qaýipti áýe tasymaldaýshylar ondyǵyna engizgendigi aıtylýda. Sońǵy úsh jyl ishinde atalmysh mekemeniń ushaqtaryna qatysty segiz oqıǵa tirkelgen. Aqtaý halyqaralyq áýejaıynda oryn alǵan oqıǵa eldiń úreıin ushyr­­­ǵanmen, eń bastysy, adamdardyń aman­dyǵy dep ushaqtyń jerge qonǵan soń órtenip, bortyndaǵy jolaýshylardyń din aman qalǵanyna shúkirshilik etýde. Gúlaıym ShYNTEMIRQYZY, «Egemen Qazaqstan». Mańǵystaý oblysy.