Foto:Kazakh Tourism PR
Amerıkanyń saıahat jaıly jazýshylar qoǵamynyń (SATW) músheleri 2023 jyly Kazakh Tourism AQSh-tyń travel-jýrnalısteri men fotograftary úshin Almaty qalasynda jáne onyń aınalasynda baspasóz týryn uıymdastyrǵan. Meımandar basty tarıhı jáne týrıstik baǵyttarmen, gastronomııamen tanysqan. Olar Qazaqstanǵa jasaǵan sapary týraly áserlerin býklette baıandaýdy jón kórgen. Bul sheteldik oqyrmandarǵa amerıkandyqtardyń kózimen Qazaqstanǵa qaraýǵa múmkindik beredi.
«Tabıǵaty men mádenıeti baı jáne beıbit Qazaqstannyń bir buryshyn aralaý jáne zertteý úlken qýanysh! Men bul el týraly alǵash ret mektepte «Dúnıejúzi tarıhy» kýrsynda bildim. Joǵary synypta oqyp júrgende Qazaqstanǵa kelý múmkindigine ıe bolamyn dep eshqashan oılamaǵan edim. Kitaptaǵy maqalalar men fotosýretter – osy tirshiligi qaınaǵan qala men kórkem el týraly áserimiz ben jyly estelikterimizdiń kórinisi», dedi kitaptaǵy maqala avtorlarynyń biri Devıd Lang.
Jınaq avtorlary Qazaqstannyń mádenıeti, tabıǵaty men dástúrleri týraly baıandap, ózindik ereksheligi men baı murasyn kórsetýge talpynǵan. Onyń ishinde ulttyq taǵamdardan bastap mýzykalyq aspaptarǵa jáne zergerlik buıymdarǵa deıin qamtylǵan.
Almatyǵa saıahat sheteldik qonaqtarǵa Qazaqstannyń gastronomııasymen jaqynyraq tanysýǵa múmkindik berdi. Olar jergilikti taǵamdardyń alýan túrligin, jergilikti turǵyndardyń qonaqjaılylyǵyn erekshe atap ótti. Sharyn shatqaly, Qaıyńdy kóli jáne Kóktóbedegi The Beatles músini saıahattyń jarqyn sátine aınalǵan.
Aıta keteıik, 2019 jyldan bastap Kazakh Tourism Amerıkanyń saıahat jaıly jazýshylar qoǵamymen (SATW) yntymaqtastyq ornatqan.
