Jer jahannyń daryndy jastarynyń basyn qosatyn báseke 2012 jyldan beri uıymdastyrylyp keledi. Tusaýkeser jarysty Aýstrııanyń Insbrýk qalasy qabyldady. Dodada 67 memleketten kelgen 1059 jas óren baq synady. 15 sport túrinen 68 júlde jıyntyǵy sarapqa salyndy. Jalpykomandalyq esepte Germanııa ozdy. Nemister 17 ret (8 altyn+7 kúmis+2 qola) jeńis tuǵyryna kóterildi. Odan keıingi satylarǵa Qytaı (8+7+2), Aýstrııa (6+4+3) Ońtústik Koreıa (6+3+2), Reseı (5+4+7) jaıǵasty. Aýstrııadaǵy alamanda elimizdiń tanymal shańǵyshysy Galına Vıshnevskaıa 1 kúmis, 1 qola medal ıelense, bıatlonshy Sergeı Malyshev úshinshi orynǵa taban tiredi.
Arada tórt jyl ótken soń alqyzyl alaý Norvegııanyń Lıllehammerinde tutandy. Bul joly 71 eldiń sportshylary óner kórsetti. Solardyń arasynan AQSh-tyń asyǵy alshysynan tústi. Amerıkalyqtar 16 (10+6+0) júlde aldy. Ońtústik Koreıa da 16 (10+3+3) medal oljalady. Alaıda júldelerdiń sapasy jaǵynan basty básekelesterinen qalyp qoıdy. Odan keıingi oryndarǵa Reseı (7+8+9), Germanııa (7+7+8), Norvegııa (4+9+6) ornalasty. Skandınavııa túbeginde jerlesterimzge qos qola medal buıyrdy. Ony mánerlep syrǵanaýshy Elızabet Tursynbaeva men bıatlonshy Arına Krıýkova enshiledi.
2020 jyly Shveısarııanyń Lozannasynda shymyldyǵy túrilgen dodada Reseı quramasy (10+11+8) dara shyqty. Shveısarııa (10+6+8) men Japonııa (9+7+1) ekinshi, úshinshi oryndardy ıelense, aralas qurama (6+6+6) men Shvesııa (6+4+7) tórtinshi, besinshi satylarǵa taban tiredi. О́kinishke qaraı, bul jarystan qorjynymyz bos qaıtty.
2024 jylǵy jarys Ońtústik Koreıanyń Konvondo qalasynda uıymdastyryldy. 70 memleketten jınalǵan 1800 sportshy saıysqa tústi. Básekede Italııanyń aldyna eshkim túse almady. Apennın túbeginiń jastary 18 (11+3+4) júldeni enshiledi. Germanııa (9+5+6), jarys qojaıyndary (7+6+4), Fransııa (7+5+6), Qytaı (6+9+3) úzdik bestiktiń qatarynan kórindi. Koreıa túbeginde barlyǵy 22 memlekettiń ánurany shyrqalyp, 32 eldiń týy kókte jelbiredi.
Úzdikter tiziminde elimiz 20 orynda tur. Otandastarymyzǵa 1 altyn, 2 qola buıyrdy. Jarys jolyna shyqqan 41 órenniń arasynan Ilıa Mızernyhtyń mereıi ústem boldy. Shańǵymen tramplınnen sekirýshiler saıysynda ol basty qarsylastary – aýstrııalyq Nıkkı Haml men polshalyq Lýkas Lýkashýkti basyp ozyp, bas júldeni qanjyǵasyna baılady. Elimiz úshin bul – tarıhı oqıǵa. О́ıtkeni Mızernyhke deıin elimizdiń birde-bir sportshysy atalǵan jarysta jeńis tuǵyrynyń eń bıik satysyna kóterilgen emes. Short-trekshi Polına Omelchýk pen 3h3 formattaǵy shaıbaly hokkeıden elimizdiń uldar quramasy qola medalǵa qol jetkizdi.
