Sapar barysynda baspasóz ókilderi áskerı bólimderdiń birneshe negizgi nysandaryn, ıaǵnı jaýyngerler urys qımyldaryna jattyǵatyn oqý polıgondaryn, sondaı-aq tehnıkalyq qamtamasyz etý ortalyqtaryn aralap shyqty. Jýrnalıster merzimdi qyzmettegi áskerı qyzmetshilerdiń kúndelikti ómirimen de tanysty. Olardyń jaýyngerlik daıarlyǵynyń qyr-syryna qanyqty. Sonymen birge, sondaǵy bilikti áskerı qyzmetshiler tarapynan respýblıkalyq aýqymdaǵy túrli oqý-jattyǵýlarǵa qatysty jáne basqa da máselelerge baılanysty tushymdy jaýap aldy.
Sonymen qatar, jýrnalıster áskerı qyzmetshilerdiń qyzmet etý jáne turmys jaǵdaılaryn kórsetetin turǵyn jáne oqý korpýstaryna da bardy. Qolbasshylyq ókilderi Qarýly Kúshterdi jańǵyrtý, jeke quramdy daıarlaý baǵdarlamalary jáne Qurlyq áskerlerin damytý perspektıvalary týraly qoıylǵan suraqtarǵa jaýap berdi.
Sapar barysynda áskerı tehnıka salasyndaǵy eń jańa ázirlemeler, sondaı-aq taktıkalyq jáne dene shynyqtyrýdy qamtıtyn oqý prosesiniń erekshelikteri kórsetildi.
«Jýrnalıstermen ótetin mundaı kezdesý bizdiń áskerı qyzmetshilerimizdiń jaýyngerlik daıyndyǵyn jáne onyń deńgeıin shynaıy kórsete otyryp, olardyń qyzmeti týraly obektıvti pikir qalyptastyrýǵa kómektesetinine senimdimiz. Sapar Qarýly Kúshter jumysynyń ashyqtyǵyn nyǵaıtý men jurtshylyqpen senimdi qarym-qatynas ornatýdaǵy mańyzdy qadam boldy», dep atap ótti general-maıor Mereke Kóshekbaev.
Baspasóz týryna qatysýshylar mundaı saparlardyń Qarýly Kúshterdiń oń ımıdjin qalyptastyrý jáne áskerı jáne azamattyq qoǵam arasyndaǵy ashyq dıalogty damytý úshin mańyzdy ekenin aıtty.
«Uıymdastyrylǵan bul shara bizge armııanyń jumysyn tikeleı kózben kórýimizge múmkindik berdi. Sonyń nátıjesinde biz áskerı ómir men onda kezdesetin ártúrli qıyndyqtar týraly, sondaı-aq el qaýipsizdigin qamtamasyz etý maqsatynda júzege asatyn jeke quramdy daıyndaý isi jaıynda jan-jaqty maǵlumat aldyq», dep atap ótti belgili qazaqstandyq bloger Tımýr.
Baspasóz týrynyń sońynda oǵan qatysqan Buqaralyq aqparat quraldarynyń ókilderi ashyq jáne mazmundy kezdesý úshin jáne áskerı qyzmetshilerdiń uıymshyldyǵy men joǵary kásibıligine óz rıshalyqtaryn bildirdi.
