Bıznes ókilderi Úkimet usynysyn talqylady

Kezdesý «Atameken» UKP qoldaýymen uıymdastyryldy. Buǵan bıznestiń, qaýymdas­tyq­tardyń, qoǵamdyq jáne sa­la­lyq birlestikterdiń 150-den asa ókili qatysty. Olardyń qa­ta­rynda otandyq salyq keńesshileri qaýymdastyǵynyń, ózin-ózi ret­teıtin qoǵamdyq tamaq­tan­dyrý uıymynyń ókilderi, Astana kásipkerler palatasynyń óńir­lik keńesteriniń jáne óńdeý jáne farmasevtıka, medısına ónerkásibi komıtet­te­riniń, «Atameken» UKP, «Alageum Electric» kompanııalar tobynyń, «Petro mining» qaýym­dastyǵynyń músheleri jáne basqalar bar.

«Memleket basshysy Qasym-Jomart Toqaev salyq júıesi teńgerimdi bolýǵa tıis ekenin atap kórsetti. Bul naqty nusqaý boldy. Ol bıznes pen memlekettiń múddelerin eskerýi kerek. Búgin biz basty máselelerdiń birin talqylaý úshin jınaldyq. Bul qosylǵan qun salyǵyna qatysty. Biz óńirlerde Ekonomıka jáne Qarjy mınıstrlikteriniń, «Atameken» palatasy ókil­de­riniń qatysýymen kezdesýler ótkizemiz. Kelip túsken bar­lyq usynys tyń­dalady. Biz biryńǵaı usta­nym qalyp­tas­tyramyz, óıtkeni Salyq kodeksi óte qarapaıym, túsinikti, naqty bolýǵa tıis», dedi M.Takıev.

QQS – bıýdjetti tolyq­ty­rýdyń negizgi kózderiniń biri. QQS mólsherlemesin arttyrý jáne saralaý bıýdjettiń munaıdan túsetin ózgermeli kiristerine táýeldiligin azaıtýǵa jáne memlekettik basym jobalardy qarjylandyrýǵa múm­kindik beredi.

О́z kezeginde A.Ámrın salyq reformasy sheńberinde QQS saralanǵan mólsherlemelerin belgileý jónindegi Úkimettiń usynystaryn aıtty.

«Biz mynadaı tetikti qaras­tyrýdy usynamyz: jalpy bel­gilengen QQS mólsherlemesi – 16%, aýyl sharýashylyǵy ónimderin óndirýshilerdi QQS-tan tolyq bosatý, al birqatar salalar úshin – 10% mólsherindegi aralyq mólsherleme. Osylaısha, Úkimet usynyp otyrǵan saralanǵan mólsherleme: 16%, 10%, 0% jáne bosatý», dep túsindirdi vıse-mınıstr.

Qazirgi ýaqytta agrarlyq sektorda sharýa qojalyqtary QQS tólemeıtini, al zańdy tulǵalar qolda bar jeńildikterge baılanysty bıýdjetke tóleýge tıisti salyqtardyń tek 30%-yn tó­leıtini atap ótildi. Jańa tetikter boıynsha olar­dyń eshqaısysy QQS tólemeıtin bolady. Bul otandyq aýyl sharýa­shylyǵy ónimderin (kar­top, qyzanaq, pııaz jáne basqalary) básekege qabiletti etýge múmkindik beredi. 10% mólsherleme qoldanylatyn sa­la túrleri bıznespen áli de talqylanyp jatyr.

Sondaı-aq kezdesýde jeńil­detilgen deklarasııa men ból­shek salyq rejimin, onyń máni – kiris shegin jylyna 600 myń AEK (2 mlrd 359 mln teńge) mólsherinde saqtaı otyryp, qaıta qaraý boıynsha usynystar aıtyldy. Negizgi ózgeris – bul rejimdi tek B2C segmentinde (bólshek saýdada) júzege asyrý. Jumysshylar sany bo­ıynsha shekteýdi alyp tastaý usynyldy. Kásipkerdiń satýdan túsken tabysy jylyna 100 mln teńgeden asatyn bolsa, salyq salynatyn tabysty eńbekaqy qory (eńbekaqy tóleý qory) somasyna azaıtý múmkindigi kózdelgen. Osylaısha, 100 mln teńge shegi jalaqyny aqtaýǵa ynta­lan­dyrýǵa múmkindik be­re­di. Bul rette bólshek sa­lyqtyń 4% mólsherlemesi (más­­lı­hattardyń 50%-ǵa tó­men­detý múm­kindigimen) saq­talady.

Salyq reformasyn iske asyrý kezinde el bıýdjetine túsetin salyq túsimderi jyl saıyn 4-5 trln teńgege artady dep kútiledi. Bul qarajat Ulttyq qorǵa táýeldilikti azaıtýǵa; mem­­­lekettik qaryz deńgeıin tó­mendetý jáne ınvestısııalyq jobalardy nesıeleýge, damý ınstıtýttaryn nyǵaıtýǵa, tur­ǵyn-úı kommýnaldyq sharýa­shylyqty, jylý-energetıka júıesin jańǵyrtýǵa qosymsha resýrstardy baǵyttaýǵa kómek­tesedi.