Foto: egemen.kz/ Erlan Omar
Buǵan deıin Prezıdent tóraǵalyǵymen ótken Úkimettiń keńeıtilgen otyrysynda QQS-ny 12-den 20 paıyzǵa kóterý josparlanyp otyrǵany aıtylǵan. Alaıda memleket basshysy bıznes ókilderimen kezdesýinde bul mólsherdiń tym joǵary ekenin aıtyp, Úkimetke qaıta pysyqtaýdy tapsyrǵan edi.
Serik Jumanǵarın QQS bıýdjetti tolyqtyrýdyń negizgi kózderiniń biri ekenin atap ótti. Mólsherlemeni arttyrý jáne saralaý bıýdjettiń qubylmaly munaı kiristerine táýeldiligin azaıtyp, Ulttyq qordyń jınaq fýnksııasyn kúsheıtýge jáne basym Memlekettik jobalardy qarjylandyrýǵa múmkindik beretinine toqtaldy.
«Mólsherleme kóp bolǵan kezde býhgalterlik esep kúrdelene túsedi, deklarasııa jasaý qıyndaıdy. Buǵan jol bermeý úshin biz 16%, 10%, 0% jáne salyqtan bosatýdy usynamyz. Biz bul rette aýyl sharýashylyǵy ónimderin óndirýshilerdi QQS-tan bosatýdy josparlap otyrmyz. Qazir sharýa qojalyqtary QQS tólemeıdi. 10% mólsherleme. Bul másele qosymsha talqylaýdy qajet etedi. Biz densaýlyq saqtaý salasy úshin tómendetilgen mólsherlemeni usynamyz. Barlyq qyzmet túrleri boıynsha usynystardy jınaımyz, eseptep sanaımyz jáne sizdermen birge sheshemiz», dedi Ulttyq ekonomıka mınıstri.
Qazir eldegi kásiporyndardyń 4 paıyzy ǵana QQS tóleıdi. Mınıstrdiń sózinshe, kásiporyndar salyq tólemeý úshin bıznesin qoldan bólshekteıdi.
«Sondyqtan esepke qoıý shegin 80 mln teńgeden 15 mln teńgege deıin tómendetý usynylady. Bul bıznes úshin teń jaǵdaı jasaıdy, jaltarý shemalarynyń aldyn alady. Bul máselede biz halyqaralyq tájirıbege baǵdarlanyp otyrmyz», dedi Serik Jumanǵarın.
Ol ekonomıkasy damyǵan, damýshy elderdiń basym kópshiliginde QQS shegi joq ekenin nemese tómen mólsherde ekenin de tilge tıek etti.
