Demokratııalyq kúshterdiń «Qazaqstan-2050» jalpyulttyq koalısııasynyń ÚNDEÝI

Qurmetti qazaqstandyqtar! Biz, Demokratııalyq kúshterdiń «Qazaqstan-2050» jalpyulttyq koalısııasynyń músheleri, azamat­tyq qoǵamnyń barlyq toptarynyń múddesin bildire otyra, jetekshi saıa­sı kúshterdiń jáne úkimettik emes uıymdardyń ashyq únqatysýyn qamtamasyz etemiz. Koalısııa jaqynda ótken pre­zıdenttik saılaý naýqanynda El­basy usynǵan halyqtyq bes reformany talqylaýǵa asa úl­ken belsendilikpen atsalysty. Biz jańǵyrtýǵa jáne ınstıtý­sıo­nal­dyq reformalardy júrgizýge ba­ǵyt­talǵan Elbasy baǵdaryna degen orasan qoldaýdyń kýási boldyq. Saılaý qorytyndysy reformalar júrgizýge tikeleı mandat bergen halqymyzdyń tutastyǵy men azamattyq birligin kúlli álemge pash etti. Qazaqstan álemdik tájirıbege súıene otyryp, damýdyń ózindik biregeı strategııasyn ázirledi. Atalǵan reformalar eń aldymen qarapaıym qazaqstandyqtardyń ál-aýqaty men ómir sapasyn arttyrýǵa baǵyttalǵan. Sondyqtan da, reformalar sheteldik saıasatkerler men sarapshylardyń joǵary baǵasyna ıe bolyp otyr. Halyqqa qyzmet etetin kásibı memlekettik apparat, ashyq ári esep beretin memleket, ádil sot pen qyzmeti aıqyn quqyqtyq organdar, ındýstrııalandyrý jáne áleýmettik-ekonomıkalyq ósim, halyqtyń birligi men tutastyǵy – osynaý reformalardyń árqaı­sy­synda elimizdi eń damyǵan mem­leketterdiń 30-dyǵyna  qosýdyń jáne Máńgilik El ıdeıasyn júzege asyrýdyń ınstıtýsıonaldyq negizin qalaý kózdelgen. «Reformalardy júzege asyrý boıynsha 100 naqty qadam» Ult jospary jarııalandy. Prezıdenttiń tapsyrmasymen qurylǵan Jańǵyrtý jónindegi ulttyq komıssııa úlken jumystar atqarýda. Memleket basshysy atap aıt­qandaı, «reformalar Qazaqstan­nyń árbir azamatynyń tikeleı qaty­sýyn talap etedi. Ońaıǵa túspeı­di, qarsylyqtar da bolady. Alaı­da, reformalar – tek memle­kettik mashınanyń ǵana emes, ha­lyqtyń isi. Reformalardyń máni – ultty jańǵyrtýda. Ulttyń sapasy, halyq rýhynyń kúshi, ýaqyt syn-qaterlerin qabyldaı bilý jáne tek qana alǵa basý buryn da memleket tabysynyń aıqyndaýshy faktory bolǵan jáne bola beredi». Búgin biz, koalısııa músheleri, jetekshi saıası partııalar jáne iri úkimettik emes birlestikter Úkimet pen Parlament ókilderiniń jáne sarapshylardyń qatysýymen «100 naqty qadam» Ult josparyn talqylaı kele, ony júzege asyrý boıynsha naqty usynystar men keńester berdik. Táýelsizdik jyldary halqymyz Elbasynyń basqarýymen qaıta qu­rylymdaý men jeńisterge toly úlken kezeńnen ótti. Qazaq­standyqtar bolashaqqa degen nyq senimmen birtutas ult retin­de nyǵaıyp, álemge jańa Qazaq­stan­dy áıgileı otyryp, tabysty memleket qurdy. Aýqymy orasan osy refor­malarǵa kirisken dál qazirgi sátte de biz aldaǵy maqsattarǵa qol jet­ki­zetinimizge – qýatty ári báse­kege qabiletti Qazaqstandy qura­ty­ny­myzǵa nyq senimdimiz. Árbir qazaqstandyqtyń el aldyndaǵy azamattyq boryshyn túısinip, barshaǵa ortaq ósip-órkendeý jolynda baryn salatynyna kámil senemiz. Koalısııa barsha azamattardy, barlyq qoǵamdyq kúshterdi Elbasynyń halyqtyq bes reformasyn jáne «100 naqty qadam» Ult josparyn júzege asyrýǵa jan-jaqty atsalysýǵa shaqyrady. Barlyǵymyz kúsh biriktirgende ǵana keler urpaqtyń bolashaǵy úshin barshaǵa arnalǵan osy zamanǵy memleketti quryp, Qazaqstandy ósip-órkendegen ári qýatty elge aınaldyra alamyz! «Nur Otan» partııasy, Qazaqstannyń Kommýnıstik halyq partııasy, «Birlik» partııasy, Qazaqstannyń Patrıottar partııasy, «Aq jol» demokratııalyq partııasy, Qazaqstannyń «Aýyl» áleýmettik-demokratııalyq partııasy, Qazaqstan halqy Assambleıasy, «Atameken» Ulttyq kásipkerler palatasy, «Qazaqstannyń azamattyq Alıansy» zańdy tulǵalar birlestigi, Qazaqstannyń Kásipodaqtar federasııasy, «Qazaqstan Respýblıkasy Ardagerler uıymy» qoǵamdyq birlestigi, «Bolashaq» qaýymdastyǵy, Qazaqstannyń kásipkerler forýmy, Múgedekterdiń «DOS» táýelsiz ómir ortalyǵy» qoǵamdyq birlestigi, «QR Qarýly Kúshter ardagerleri» qoǵamdyq birlestigi, «QR Qarýly Kúshter ardagerleri» Aýǵanstan soǵysy ardagerleri uıymdarynyń qaýymdastyǵy, Qazaqstan isker áıelderi qaýymdastyǵy, «Qazaqstan tutynýshylarynyń ulttyq lıgasy» zańdy tulǵalar birlestigi, «Jasyl» ekonomıka men G-GLOBAL-dy damytý úshin koalısııasy» zańdy tulǵalar birlestigi, Ulttyq ǵylym akademııasy, Qazaqstan Jazýshylar odaǵy, Kásipker áıelder odaǵy, «Respýblıkalyq áıelder keńesi» qoǵamdyq birlestigi, «Qazaqstan-2050» jalpyulttyq qozǵalysy. 2015 jylǵy 18 maýsym, Astana qalasy.