Oshta qaraqshylyq jasady degen kúdikpen eki qazaqstandyq ustaldy

ASTANA. 3 mamyr. Qyrǵyzstannyń Osh qalasy aeroportynda qaraqshylyq shabýyl jasaýǵa qatystary bar degen kúdikpen eki qazaqstandyq ustaldy. Bul týraly AkiPress habarlady. Anyqtalǵan málimetter boıynsha, 2014 jyldyń jeltoqsan aıynda Osh qalasyndaǵy aeroportta qaraqshylyq shabýyl jasaý kezinde 6 mln. 871 myń 378 dollar aqsha qoldy bolǵan. Muny Qyrǵyzstan parlamenti «Ata Meken» fraksııasynyń otyrysynda ishki ister mınıstrligi bas tergeý basqarmasynyń bastyǵy Talant Ýmetalıev málimdedi. Onyń aıtýyna qaraǵanda, júrgizilgen zertteý sharalary barysynda kýá retinde 150 adamnan málimet suralǵan. Aqyrynda sáýir aıynyń aıaǵynda osy qylmysqa qatysy bar degen kúdikpen eki qazaqstandyq azamat jáne týrıstik fırmanyń jetekshisi ustalǵan. «Rahmanqulov, Syrǵabaev, Zakırov ustaldy, budan bólek taǵy qazaqstandyq eki azamattyń osyǵan qatystary barlary anyqtaldy, olarǵa izdeý jarııalandy. Qazir olardyń qolǵa túskenderi jóninde aqpar kelip otyr. Endi halyqaralyq kelisim boıynsha kelissóz júrgizip jatyrmyz», - dedi T.Ýmetalıev. Aıta keteıik, oqıǵa 2014 jyldyń 27 jeltoqsany kúni oryn alǵan. Quqyq qorǵaý organdary qyzmetkerleriniń ýnıforma men betperde kıip alǵan 6 adam «Toıota Estıma» markaly avtomashınamen kelip, «Osh» aeroportynyń bir bólmesine qarýly shabýyl jasaıdy. Olardyń qoldarynda Kalashnıkov avtomaty bolady. Belgisiz kisiler sol jerden ishinde 5 mln. 679 myń dollar aqshasy bar 5 úlken sómkelerdi alyp ketedi. Budan bólek, kepil retinde «Asman-Týr» týrıstik fırmasynyń dırektory Rýslan Kýlatovty ózderimen birge áketedi. Qolǵa túsken azamattardyń bári Batken oblysynyń turǵyndary bolyp shyqty. Qurysh Nurymbet. Derek, sýret: AkiPress.