О́risi keń órkendi ister

Aqtóbege bir kúndik jumys saparymen Qazaqstan Respýblıkasy Premer-Mınıstriniń orynbasary Berdibek Saparbaev kelip qaıtty. Ol túske deıin Qobda aýdanynda bolyp, Keńes Odaǵynyń Batyry Álııa Moldaǵulovanyń 90 jyldyq mereıtoıyna qatysty, aýdan turǵyndarymen kezdesti, memleket pen jeke áriptestik negizinde salynǵan birqatar nysandarmen tanysty. Tústen keıin Premer-Mınıstrdiń orynbasary Berdibek Saparbaev «Týǵan jerge taǵzym» kásipkerliktiń áleýmettik jaýapkershiligi boıynsha óńiraralyq semınar-keńes jumysyna qatysty. Oǵan Aqtóbe, Atyraý, Qyzylorda, Mań­ǵystaý jáne Batys Qazaqstan oblys­tarynyń bıznes qurylymdarynyń, qar­jy ınstıtýttarynyń, memlekettik or­gandardyń, úkimettik emes uıymdarynyń ókil­deri qatysty. Semınar-keńestiń maq­saty – bıznestiń áleýmettik jaýapkershiligi salasynda tájirıbe almasý bolyp tabylady. Oblys ákimi Arhımed Muhambetov qysqasha sóz sóıledi. Bul baǵytta oblysta úlgi alarlyq, úırenerlik ıgi ister barshylyq. О́ńirde 2012-2014 jyldary «Kórkeıe ber, týǵan jer» aksııasy nátıjeli ótkizilip, oǵan 4 myńnan astam kásiporyn, zańdy jáne jeke tulǵalar atsalysqany belgili. Oblys ákiminiń birinshi orynbasary Roza Kemalova aksııa qorytyndylary jáne óńir kásipkerleriniń áleýmettik jaýapkershiligi haqynda baıandady. Onyń aıtýynsha, osy aksııa ótkizilgennen bas­tap jalpy somasy 6 mıllıard teńgeniń áleýmettik jobalary men is-sharalary júrgizilgen. «Qazhrom» AQ sońǵy úsh jylda 980 mıllıon teńge, al «SNPS- Aqtóbemunaıgaz» AQ 1,5 mıllıard teńge demeýshilik jasaǵan. – О́ńirdegi jeke kásipkerler bıznestiń áleýmettik jaýapkershiligin jete túsinýde. «Altyn qyran» kompanııalar birlestiginiń tóraǵasy Islambek Saljanovtyń ózi týǵan Qobda aýylyna jalpy quny 460 mıllıon teńge turatyn zamanaýı jabdyqtalǵan 150 oryndyq sándi balabaqsha salyp bergenin aıtsaq ta jetkilikti. Aqtóbelik kásipkerler «Týǵan jerge taǵzym» respýblıkalyq aksııasyna belsene qatysatynyna senim mol, – dedi Roza Keńesqyzy. Sodan keıin Atyraý oblysy ákiminiń orynbasary Aıgúl Ájiǵalıeva, Batys Qazaqstan oblysy ákiminiń orynbasary Baqtııar Mákenuly, Qyzylorda oblystyq ishki saıasat basqarmasynyń basshysy Ǵaınolla Jarqynbaev sóılep, bıznestiń áleýmettik jaýapkershiliginiń óz óńirlerinde qalaı oryndalyp jatqany jaıly málimdedi. Berdibek Mashbekuly olarǵa ár jyldarǵy mektep túlekteriniń múmkindigin týǵan jerin túletýge jumyldyrýdaǵy jumystyń áli dittegen deńgeıden kórinbeı jatqanyn eskertti. Iri kompanııalardyń ákim­dikpen aradaǵy memorandýmy aıasyndaǵy atqarylǵan sharýa­lar­dy maldanýdy qoıatyn kez kel­genin qadap aıtty. Túlek­terdi týǵan jerdi túletýge jumyl­dyrýǵa nazar aýdardy. Semınar-keńesti qo­ry­tyndylaǵan Premer-Mı­nıstr­diń orynbasary Berdibek Sapar­baev Elbasynyń 2007 jyly Jezqazǵanda ótken kásip­ker­lerdiń forýmynda kásipkerliktiń áleýmettik jaýapkershiligi týraly tapsyrma bergenine toqtaldy. – Memleket kásipkerlikti qol­daýǵa basa nazar aýdaryp keledi. Sonyń arqasynda qazir kásipkerler aıaǵynan turdy, endi olar elge qaraı burylýy kerek. Úkimet kásipkerlikti damytýǵa serpin beretindeı baǵdarlamalar qabyldap, júzege asyrýda. Sonyń biri – «Jumyspen qamtýdyń jol kartasy-2020» memlekettik baǵdarlamasy deý oryndy. Tabys taýyp, paıda kórip otyrǵan kásipkerler týǵan jerlerine baryp, aýyldastarymen, oqýshylarmen kezdesip, óziniń osy jerden bilim jáne tárbıe alyp, qatarǵa qosylǵanyn kórsetýleri qajet. Bul keıingi jas urpaqqa oı salady, jaqsy oqyp, azamat bolýǵa talpyndyrady. Sondaı-aq, patrıottyqqa tárbıeleıdi, týǵan jerge degen súıispenshilik sezimin qalyptastyrady. Mine, «Týǵan jerge taǵzym» aksııasynyń maqsaty da, máni de osynda, – dedi Berdibek Mashbekuly. Ol bul semınar-keńes ótkizilip otyrǵan Aqtóbede úırenetin úrdister bar ekenine toqtaldy, keıbir ákimderdiń aksııanyń mánin áli de jete túsinbegenine qynjylys bildirdi. Berdibek Saparbaev oblys ortalyǵyndaǵy birqatar nysandarda bolyp, jumystarymen tanysty. «Nur-Aqtóbe» shaǵyn aýdanyndaǵy 1200 oryndyq mekteptiń bıyl paıdalanýǵa beriletinin estip, rızashylyq tanytty. Jalpy quny 1693899 mıllıon teńge turatyn orta mekteptiń qurylys jumys­tarynyń 60 paıyzy júzege asyrylǵan. «Klınıka Darý» medısınalyq saýyqtyrý ortalyǵynda da boldy. Klınıka dırektory Ǵalymjan Eleýov jobanyń 1,6 mıllıard teńgege túskenin jetkizdi. Onyń 414,7 mıllıon teńgesi memlekettik qoldaý retinde, sonyń ishinde, 385,4 mıllıon teńgesi «Bıznestiń jol kartasy-2020» baǵdarlamasy boıynsha bólingen. Osy jerde ol óńirdiń áleýmettik sala qyzmetkerlerimen kezdesti. Premer-Mınıstrdiń orynbasary Berdibek Saparbaev «Aqtóberentgen» AQ-ta bolyp, óndirispen tanysty, jergilikti úlesti damytý jáne oblys kásiporyndaryndaǵy eńbek qatynastarynyń aǵymdaǵy jaǵdaıy máselelerine arnalǵan keńeske qatysty. Satybaldy SÁÝIRBAI, «Egemen Qazaqstan».