Depýtattarǵa Memleket basshysynyń Abaı oblysynyń ákimi laýazymyna eki kandıdatty – Prezıdent keńesshisi – Prezıdenttiń baspasóz hatshysy Berik Ýálı men Abaı oblysy Kýrchatov qalasynyń ákimi Bolat Ábdiralıevti usyný týraly haty oqyldy.
Ashyq daýys berý qorytyndysy boıynsha 126 depýtattyń 102-si Berik Ýálıdiń kandıdatýrasyna daýys berdi. Bolat Ábdiralıevtiń kandıdatýrasyn 24 depýtat jaqtady. Prezıdenttiń tıisti Jarlyǵymen Berik Ýálı Abaı oblysynyń ákimi bolyp taǵaıyndaldy.
Oblys aktıvimen kezdesýde Premer-mınıstr óńirdiń damýyna qosqan úlesi úshin Nurlan Uranhaevqa alǵys bildirdi. Oljas Bektenov oblystyń jańa ákimi Berik Ýálıdi tanystyrdy. О́ńir basshylyǵy aldyna Prezıdent ekonomıkany ártaraptandyrýǵa jáne ınvestısııalyq ahýaldy jaqsartýǵa basa nazar aýdara otyryp, óńirdi áleýmettik-ekonomıkalyq damytý jóninde aýqymdy mindetter qoıǵany atap ótildi. Alakól kóliniń, óńirdegi tarıhı jáne mádenı oryndardyń áleýetin asha otyryp, týrızm salasyna erekshe kóńil bólý qajet.
Abaı oblysy Reseı jáne Qytaımen shektesedi, halyqaralyq tranzıttik saýda toraby sanalady, sondyqtan qolda bar tranzıttik áleýetti barynsha paıdalaný qajet. Aıagóz-Tachen baǵytyndaǵy temirjol jáne «Baqty» qurǵaq porty qurylysy boıynsha mańyzdy ınfraqurylymdyq jobalardy iske asyrý máselelerin baqylaýda ustaý tapsyryldy.
Sondaı-aq óńir halqyn sapaly ári qoljetimdi azyq-túlikpen qamtamasyz etý úshin aýyl sharýashylyǵy ónimderin qaıta óńdeýdi damytýdyń mańyzdylyǵy atap ótildi.
* * *
Memleket basshysynyń tapsyrmasy boıynsha Premer-mınıstr Oljas Bektenov pen Prezıdent Ákimshiliginiń basshysy Aıbek Dádebaı Shyǵys Qazaqstan oblysy máslıhattary depýtattarynyń jınalysyna qatysty.
Jınalys barysynda depýtattarǵa Memleket basshysynyń Shyǵys Qazaqstan oblysynyń ákimi laýazymyna eki kandıdat – ShQO ákiminiń birinshi orynbasary Nurymbet Saqtaǵanov pen ShQO Ulan aýdanynyń ákimi Arman Bekbosynovty usyný týraly haty oqyldy.
Ashyq daýys berý nátıjesi boıynsha depýtattar Nurymbet Saqtaǵanovtyń kandıdatýrasyn qoldady, oǵan 148 depýtattyń 104-i daýys berdi, Arman Bekbosynovty 41 depýtat jaqtady.
Memleket basshysy Shyǵys Qazaqstan oblysynyń ákimi Nurymbet Amanuly Saqtaǵanovty taǵaıyndaý týraly Jarlyqqa qol qoıdy.
Oblys aktıvimen kezdesýde Oljas Bektenov Ermek Kósherbaevqa nátıjeli jumysy men óńirdiń damýyna qosqan úlesi úshin alǵys bildirdi. Keıingi jyldary Shyǵys Qazaqstan oblysyna shamamen 1,5 trln teńge ınvestısııa tartylǵany atap ótildi. Bul jańa jumys oryndaryn ashýǵa, ekonomıkalyq ósimdi qamtamasyz etýge múmkindik berdi. Oblysta ınfraqurylymdyq jáne áleýmettik jańa nysandar iske qosyldy.
Jańa ákimdi tanystyrǵan Premer-mınıstr Memleket basshysynyń Shyǵys Qazaqstan oblysy basshylyǵy aldyna qoıǵan mindetterge toqtaldy. Iske asyrý halyqty jumyspen qamtamasyz etip, óńir ekonomıkasynyń damýyna serpin beretin perspektıvaly baǵyttar aıqyndaldy. Basym jobalar qataryna shaǵyn jáne orta bıznesti qoldaý, aýyl sharýashylyǵy ónimderin qaıta óńdeý, sıfrlyq sheshimderdi engizý jatady. Halyqty sapaly aýyzsýmen qamtamasyz etý, ınjenerlik ınfraqurylymdy jańǵyrtý jumystaryn kúsheıtýdiń mańyzdylyǵy atap ótildi.
Tabıǵı demalys aımaqtary men tarıhı-mádenı oryndardy damytý arqyly týrıstik áleýetti ashýǵa erekshe nazar aýdaryldy. Buqtyrma sý qoımasy arqyly elimizdegi eń iri kópirdiń ashylýy, Katonqaraǵaı jáne Zaısan kýrorttyq aımaqtarynda áýejaılardyń salynýy sala men jalpy ekonomıkanyń damýyna qosymsha serpin beredi.
Basym mindetter qatarynda arnaıy ekonomıkalyq jáne ındýstrııalyq aımaqtardy ınjenerlik ınfraqurylymmen qamtamasyz ete otyryp, ınvestorlar úshin qolaıly jaǵdaı jasaý, ónerkásipte zamanaýı tehnologııalar men ınnovasııalyq tásilder qoldaný jáne basqa da máseleler belgilengen.
