Jumysshynyń qoldaýshysy – kásipodaq

Bıylǵy Jumysshy maman­dyq­tary jyly kásipodaqtar jumysy­nyń belsendiligi arta túsetini sózsiz. «Soltústik Qazaqstan oblysynyń kásipodaq ortalyǵy» aý­maq­tyq kásip­odaqtar birlestiginiń tóraǵasy Erik Nuraqaevtyń aıtýynsha, ataýly jyl jumysshy mamandyqtaryna nazar aýda­rýdaǵy mańyzdy qadam bolyp otyr.

«Qoǵamda osy kúnge deıin halyq balalaryna joǵary bilim berýge tyrysyp baqty. Balanyń oı eńbegine degen qabileti eskerilmeı qaldy. Sondyqtan da mamandyqty ıgere almaıtyn sapasyz dárigerler, muǵalimder, zań­ger­ler men ekonomıster qatary kó­beıdi. Jumysshy mamandyǵyn ıgerýge tıisti azamattar kózge ilinbedi. Bul ekonomıkanyń naqty sektorynda óndiristiń sapa­syn túsirdi. Endi osy olqylyqty eńserý usyny­lyp otyr. Jumysshy mamandyǵynyń mártebesin arttyrý, bedelin kóterýge basa mán berilmekshi. Bul óte durys sheshim. Oblystyq bilim basqar­masy men oblystyq kásipodaq komıteti jumysshy mamandyqtaryn daıyndaý jóninde jyldyq sharalar josparyn jasady. Sonyń ishinde oblystaǵy jumysshy mamandyqtaryn daıyndaıtyn 24 kolledjdiń aldyna jańa mindetter qoıyldy», dedi ol.

Byltyr Soltústik Qazaqstan oblysy ákimdigi, jumys berýshiler birlestik­teri, óńirlik kásipodaqtar birlestigi arasynda 2024–2026 jyldarǵa arnalǵan úshjaqty kelisim jasaldy. Qujatta naq­ty sektordaǵy jalaqyny ınflıasııa deń­geıine sáıkes mindetti túrde ındeksteý, óndiristik keńester men eńbek qaýipsizdigi ınspektorlary­nyń qyzmetin jetildirý, tehnıkalyq ınspektorlarǵa qatysty qosymsha yntalandyrý sharalaryn engizý syndy mindettemeler bekitildi.

Qazir Soltústik Qazaqstan oblysynda 6 286 ujymdyq kelisimshart jasalǵan, bul kásiporyndardyń 93,6%-yn qamtıdy. Kásipodaq uıymdary bar mekemelerde ujymdyq sharttar bar­lyq 1265 kásiporynda jasalyp, 100% oryndaldy. Kásipodaq músheleriniń belsendiliginiń arqasynda jańadan 9 bastaýysh kásipodaq uıymy qurylyp, oǵan 419 múshe birik­ti­rildi. Jańa uıym­dar densaýlyq saqtaý, bi­lim berý, mem­lekettik mekemeler, aýyl sharýa­shy­lyǵy, mádenıet, sport sala­la­rynyń salalyq kásipodaqtaryna kirdi.

Kásipodaq uıymdary kóktemgi sý tasqynynyń zardaptaryn joıýǵa belsendi aralasyp, dambalar n­y­ǵaıtý, tasqynǵa qarsy jumystarǵa qa­tysýshylarǵa tamaq uıymdastyrdy. Zardap shekken 793 kásip­odaq múshesine ­53 mıllıon teńgeden astam gýma­nı­tarlyq kómek kórsetildi.

«Týǵan jer» ekologııalyq jobasyn iske asyrý jalǵasýda, onyń aıasynda Kásip­odaq qozǵalysy ardagerleriniń alleıa­­syna 110 sibir shyrshasy otyr­ǵy­zyl­dy.

Búginde Jumysshy mamandyqtary jylyna arnalǵan is-sharalar josparlaryn tıimdi ótkizýge daıyndyqtar jasalyp jatyr. Erekshe nazar kásibı sheberlik baıqaýlaryna, jumysshy mamandyqtaryn meńgerip jatqan jas­tardyń sletterine, jas mamandardy oqy­týǵa aýdarylady. Úzdik jumysshy mamandardy dáripteý, olardy yntalandyrý sharalary da nazardan tys qalmaıdy. Jumysshy mamandyǵynyń bedelin arttyrý maqsatyndaǵy úzdik sharalarǵa arnalǵan baıqaýlar da ótkiziledi.

Soltústik Qazaqstan oblysy