Ońtústik Qazaqstanda jas kelinshek eki qyzyn býyndyryp óltirdi

ASTANA. 3 mamyr. Ońtústik Qazaqstan oblysynyń Saryaǵash aýdanynda jas kelinshek kishkentaı eki qyzyn býyndyryp óltirgen. Bul týraly KTK telearnasy habarlady. «Ońtústik Qazaqstannyń Saryaǵashynda jas kelinshek eki kishkentaı qyzymen esep aıyrysty. Olardyń biri – toǵyzda, ekinshisi – on birde. Balalaryn óltirýshi áıel qamaýǵa alyndy. Onyń bulardan basqa taǵy bir uly bar», - delingen habarlamada. Saryaǵashta bolǵan qandy oqıǵa jurtty qatty teńseltti. Ásirese, eki qyz bala oqıtyn mekteptegiler muny qalaı baǵalaýdy bilmeı, dal bolýda. Eń sumdyǵy sol, ekinshi synypta oqıtyn Balym men besinshide oqıtyn Amankúldi týǵan analary tunshyqtyryp óltirgen. Muny estigen balalar da, oqýshylar da qatty qapa bolyp otyr. «Men buǵan baılanysty eshteńe aıta almaımyn, bárinen buryn qyzdarǵa obal boldy. Áıeldi buǵan ne májbúr etýi múmkin? Men tipti de bilmımin, aıtarǵa sózim joq, onyń muny qalaı jasaǵanyn da túsinbeımin», - dedi mektep dırektory Lázakat Taǵaeva. Qyzdaryn óltirgen Ferýza úsh balasymen sol bólmede turypty. Onyń taǵy bir qyzyn ájesi men atasy baǵyp otyrǵan kórinedi. Al balalardyń ákeleri budan 7 jyl buryn qaıtys bolypty. Sodan beri jesirliktiń kebin kıip kele jatqan áıel kondıter sehynda jumys jasap, kúnin ázer kórip keledi eken. Kórshileri Ferýzanyń qaryzǵa batyp qalǵanyn aıtady. Al polıseılerge qyzdaryn qaıtip óltirgenin aıtyp júrgeninde áıel mundaı ómirden sharshaǵanyn da jetkizipti. Qylmysty oqıǵa oryn alǵan bólme aırap-jaırap jatyr eken. 33 jastaǵy Ferýza týraly kórshilri kóp nárse aıta almady. Olar tek onyń eshkimmen jaqyn dostasyp ketpenin keltirgen. Sondaı-aq eshkimmen uryspaǵan da kórinedi. Ana retinde qatal bolǵan. Quqyq qorǵaý organdarynyń qyzmetkerleri áıeldiń qyzdaryn erler galstýgymen býyndyrǵanyn boljap otyr. Polısııa budan artyq eshteńe aıtyp otyrǵan joq. Qazir tek onyń tutqynǵa alynǵany ǵana belgili. Atasy men ájesiniń qolyndaǵy úlken qyzynan bólek, toǵyzynshy synypta oqıtyn uly da bar. Sol bala úıde ne bolǵanyn birinshi bolyp kóripti. Qazir bala týystarynyń qolynda turyp jatyr. Onymen psıhologtar jumys jasaýda. Qurysh Nurymbet. Derek, sýret: KTK