Qazaqtan shyqqan tuńǵysh kásibı dırıjer Shamǵon Qajyǵalıev qaıtys boldy

ASTANA. 3 mamyr. Búgin qazaqtan shyqqan tuńǵysh kásibı dırıjer, pedagog, dombyrashy, KSRO Halyq ártisi Shamǵon Qajyǵalıev qaıtys boldy. Bul týraly zakon.kz habarlady. Dańqty dırıjerdiń qazasy týraly Táttimbet atyndaǵy óner kolledjiniń bólim meńgerýshisi Serjan Musaıyn facebook-tegi paraqshasyna: «О́te talantty adam, KSRO Halyq ártisi, professor, Qazaqstan Respýblıkasy Memlekettik syılyǵynyń ıegeri, «Parasat» ordeniniń kavaleri Shamǵon Qajyǵalıev dúnıeden ótti», – dep jazǵan. Shamǵon Saǵaddınuly Qajyǵalıev 1927 jyldyń 15 maýsymynda Batys Qazaqstan oblysynyń Uıalyqum (qazirgi Jańǵala aýdany) aýylynda dúnıege keldi. Ata-anasynan erte aıyrylǵan ol balalar úıinde tárbıelengen. Jańaqazan aýylyndaǵy Kırov atyndaǵy Qamysh-Samar mektebinde bilim aldy. 10 jasynda dombyradan oblystyq olımpıadada, al 20 jasynda dombyrashylardyń respýblıkalyq baıqaýynda laýreat atandy. 1950 jyly Almatydaǵy Qurmanǵazy atyndaǵy qazaq konservatorııasynyń halyq aspaptary fakýltetin támamdady. Shamǵon Saǵaddınulynyń jetekshiligimen orkestr M.Glınkı, L.Bethoven, V.Mosart, G.Berlıoz, P.Chaıkovskıı, S.Rahmanınov, S.Prokofev, A.Hachatýrıan, D.Shostakovıch, A.Jubanov, M.Tólebaev, G.Jubanova, S.Muhamedjanov syndy ataqty kompozıtorlardyń shyǵarmalaryn oryndady. Elaman Qońyr. Derek, sýret: zakon.kz.