Foto: smolensk-i.ru
Depýtattyń aıtýynsha, memleketimiz balalar úıinde tárbıelenip jatqan jetim balalardy otbasylyq ortaǵa ornalastyrý úshin túrli sharalar qabyldady. Alaıda, statıstıkalyq derekterge qaraǵanda bala asyrap alý úrdisi baıaý júrip jatyr.
Búginde 5 myńnan astam azamat bala asyrap alý kezeginde turǵanymen, 2023 jyly – 194, 2024 jyly – 153 bala ǵana jańa otbasyn tapqan. Bul kórsetkishter bala asyrap alý júıesindegi ákimshilik kedergilerdiń bar ekenin jáne prosestiń uzaqqa sozylatynyn ańǵartady.
«Jetim balalar – memlekettiń qamqorlyǵyna muqtaj eń álsiz top. Olardyń árqaısysy tolyqqandy otbasynda tárbıelenýge laıyqty. Sondyqtan, memleket tarapynan qabyldanyp jatqan baǵdarlamalar men zańnamalyq sharalar olardyń shynaıy qajettilikterine saı bolýy kerek. О́kinishke qaraı, kóptegen jetimderimiz balalar úıinde tárbıelenip, otbasynyń jylýyn sezinbeı ósedi. Bul olardyń bolashaqta qoǵamǵa beıimdelýin qıyndatady», dedi Gennadıı Shıpovskıh.
Gennadıı Shıpovskıh bala asyrap alý rásimin jeńildetý jáne ony sıfrlandyrý, qujattardy rásimdeý men qajetti tekseristerdi onlaın formatta ótkizý arqyly úmitkerler úshin prosesti ońaılatý qajet ekenin atap ótti.
«Jetim balalardy otbasylyq ortada tárbıeleý saıasatyn kúsheıtý, qamqorshylyq pen patronattyq tárbıe júıesin jetildirý, patronattyq tárbıeshilerge tólenetin qarjylyq qoldaýdy arttyrý mańyzdy. Qoǵamdyq baqylaýdy kúsheıtý jáne asyrap alý prosesiniń ashyqtyǵyn qamtamasyz etý úshin úkimettik emes uıymdar men qoǵam belsendilerin tartý kerek. Bala asyrap alý salasyndaǵy zańsyzdyqtarmen kúresti kúsheıtý qajet, sybaılas jemqorlyq táýekelderin azaıtý úshin qatań baqylaý sharalaryn engizý kerek», dedi depýtat.
