Seýl shaharynda Mıhaıl Shaıdorov «shý» degennen-aq tizgindi qolǵa aldy. Áýeli qysqy baǵdarlamanyń qorytyndysy boıynsha kósh bastady. Odan keıin erkin saıysta da jasyndaı jarqyldap, jalpy esepte 285,10 upaı jıdy. Bul otandasymyzdyń jeńis tuǵyrynyń eń bıik satysyna kóterilýine jetkilikti boldy. Kúmis medaldy Chha Djýnhvan ıelendi. Álem chempıonatynyń kúmis júldegeri, Azııa oıyndarynyń jeńimpazy degen ataǵy bar Ońtústik Koreıanyń oǵylany 265,02 upaı jınady. Qola medal amerıkalyq Djımmı Maǵa buıyrdy. Ol 245,01 upaıdy enshiledi.
Áıelder arasyndaǵy jarysta Sofıa Samodelkına jetinshi orynǵa taban tiredi. Byltyr ǵana elimizdiń azamattyǵyn alǵan sportshynyń óneri 193,37 upaımen baǵalandy. Bul básekede altyn medaldy Ońtústik Koreıa ókili Kım Chhe Ion (222,38 upaı) jeńip alsa, amerıkalyq Breddı Tennel (204,38 upaı) men Sara Everhard (200,03 upaı) kúmis pen qola medaldy ıelendi. Sondaı-aq týrnırde Dıas Jırenbaev, Sofııa Farafonova, Boısangýr Datıev pen Gaýhar Naýryzova juby óner kórsetti. Biraq olar úzdikter qataryna jaqyndaı almaı, qalyń toptyń arasynda qalyp qoıdy.
Mánerlep syrǵanaýǵa qatysty aıta keterlik taǵy bir mańyzdy oqıǵa, 25 aqpan – 2 naýryz aralyǵynda Majarstannyń Debresen qalasynda jastar arasyndaǵy álem birinshiliginiń jalaýy jelbireıdi. Bul básekede Nıkıta Krıvosheev, Artýr Smaǵulov, Veronıka Kım, Safııa Abaeva baq synaıdy.
