Nepalda 8 kún boıy úıindi astynda jatqan 105-tegi qarııa tiri tabyldy

ASTANA. 4 mamyr. Nepalda 25 sáýirde bolǵan joıqyn jer silkinisiniń saldaryn joıý jumystary men qutqarý sharalary áli jalǵasýda. Apattan keıin 8 kún ýaqyt ótkende óz úıiniń astynda qalǵan 105 jastaǵy qarııa tiri tabyldy. Bul týraly NDTV telearnasyna silteme jasap, lenta.ru habarlady. Oqıǵa Kımtang aýylynda bolǵan. Fanchý Geıl (Fanchu Ghale) esimdi er adamnyń zilzala saldarynan aıaq-qoly ǵana jeńil jaraqattanǵan. Qazir ol áskerı tikushaqpen aýrýhanaǵa jetkizildi. Budan bólek, taǵy bir uzaq jasaǵan er adamnyń úıindi astynan aman tabylǵany anyqtaldy. RIA «Novostı» aqparattyq agenttigi taratqan málimetke súıensek, onyń jasy 101-de. Senbi kúni óz úıiniń astynan tabylǵan ol qarııa da qazirgi tańda aýrýhanada em-dom qabyldaýda. Sondaı-aq, keshe qutqarýshylar eldiń soltústik-shyǵysyndaǵy aýdandardyń birinen bir er jáne eki áıel adamnyń tiri tabylǵanyn habarlady. Osyǵan deıin Nepal bıligi úıindiler astynan tiri qalǵandardyń tabylýy ekitalaı dep, úmitterin úzgen edi. Tipti qutqarýshylar shalǵaıdaǵy eldi mekenderge jetken kezde qurban bolǵandardyń sany kúrt artýy múmkin ekenin de joqqa shyǵarmady. Aıta keteıik, Nepaldaǵy magnıtýdasy 7,9 balldy quraǵan joıqyn zilzala 25 sáýirde boldy. Jerasty dúmpýiniń oshaǵy el astanasy – Katmandýdan soltústik-batysqa qaraı 82 km. jerde tirkeldi. Dúmpýdiń tereńdigi 15 km.-ge deıin jetken. Sońǵy derekter boıynsha, qaza tapqandardyń sany 7 200-den asqan. 14 myńnan astam adam ártúrli deńgeıdegi jaraqat alǵan. Búginde zilzala áli tyńshyǵan joq. О́tken aptanyń sońynda birneshe jer silkinisi tirkeldi. Olardyń ishinde magnıtýdasy 6,7 balldy quraǵan dúmpýler de boldy. Elaman Qońyr. Derek: lenta.ru. Sýret: AFP.