Jıyn barysynda Aıda Balaeva Memleket basshysynyń mádenıet pen ádebıetke erekshe kóńil bólip otyrǵanyn atap ótti.
«Elimizdegi jas jazýshylar men aqyndarǵa arnalǵan Prezıdenttik ádebı syılyq 2023 jyly Prezıdent Jarlyǵymen taǵaıyndalyp, otandyq ádebıet álemindegi mańyzdy oqıǵalardyń birine aınaldy. Bul – Memleket basshysynyń mádenıet salasyn júıeli túrde jańǵyrtýǵa baǵyttalǵan bastamalarynyń biri. Syılyqtyń basty maqsaty – shyǵarmashyl jastardy qoldaý, jańa týyndylardyń jaryq kórýine jol ashý. Memleket basshysynyń mádenıet pen ónerdi damytýǵa erekshe mán berýi – onyń ustanyp otyrǵan reformalary men bastamalarynyń zańdy jalǵasy. О́ıtkeni mádenıetti, ádebıetti damytý – jas urpaqtyń jan-jaqty damýynyń negizgi tetikteriniń biri. Al rýhanı turǵydan kemeldengen, bilimdi, eńbeksúıgish ári patrıot azamattardan quralǵan qoǵamda zań men tártip ústemdik qurady, adamdar óz áreketteri úshin jaýapkershilik alady, dástúrge qurmetpen qarap, ulttyń negizgi qundylyqtaryn ardaqtaıdy», dedi mınıstr.
Prezıdenttik arnaýly ádebı syılyǵy «Proza» atalymy boıynsha «2026» shyǵarmasy úshin Esbol Sosıalhanǵa, «Poezııa» atalymy boıynsha «Boz ushqat» óleńder jınaǵy úshin Jánibek Álımanovqa, «Dramatýrgııa» atalymy boıynsha «Apataı» dramalyq týyndysy úshin Álisher Aıtýarǵa, «Balalar ádebıeti» atalymy boıynsha «Roket Era» povesi úshin Áset Syzdyqovqa berildi. Aıta keteıik, syılyqqa 18-35 jas aralyǵyndaǵy qalamgerlerdiń buryn halyqaralyq, ulttyq baıqaýlarǵa qatyspaǵan týyndylary usynylǵan.
Ár dáýirdiń óz aqıqaty, óz úni bar. Búgingi ádebıet – tek eski súrleýdi qaıtalaý emes, jahandaný dáýirinde ulttyq bolmysty saqtaı otyryp, jańa zamannyń rýhyn beıneleý. Qalamger – ýaqytpen qatar tynystaıtyn, dáýirdiń dıdaryn kórsetetin, bolashaqqa baǵdar jasaıtyn tulǵa. Osy rette Aıda Balaeva jas qalamgerlerge mol jaýapkershilik júkteletinin atap ótti.
«Sizder óz zamandaryńyzdyń beınesin jańasha sýrettep, jańa kózqaras qalyptastyrýǵa tıissizder. Uly qalamgerlerdiń jolyn jalǵastyryp qana qoımaı, ádebıetti jańa beleske kóterý – sizderdiń qoldaryńyzda. HH ǵasyrdaǵy ádebıet adamnyń jan álemin tereńnen sýrettese, HHI ǵasyrdyń qalamgerleri jańa tehnologııalar dáýirindegi adam taǵdyry, jahandaný men ulttyq bolmys, jeke tulǵanyń kúresi sekildi taqyryptarǵa qalam terbeýi kerek», dedi A. Balaeva.
Marapattan soń basqosýda qazirgi ádebı úrdister men ózekti máseleler talqylanyp, túrli usynystar men tyń oılar ortaǵa salyndy. Sondaı-aq marapattaý rásimi aıasynda «Qazaqstannyń ádebı-tanymdyq panoramasy» jobasy negizinde jaryq kórgen 20 jas qalamgerdiń kitaptarynyń tusaýy kesildi. Bul – Mádenıet jáne aqparat mınıstrligi men Qazaqstan Jazýshylar odaǵy arasyndaǵy strategııalyq áriptestik nátıjesinde júzege asqan úsh iri jobanyń biri. «Qazaqstannyń ádebı-tanymdyq panoramasy» jobasy aıasynda jas qalamgerler elimizdiń túkpir-túkpirin aralap, jańa shyǵarmalar jazǵan. Nátıjesinde, jyl sońyna deıin qazaq ádebıetine 20 jańa týyndy qosylyp, ár avtorǵa 4 mln teńge kóleminde qalamaqy taǵaıyndalǵan.
Aıta keteıik, Prezıdenttiń Ulttyq quryltaıdaǵy tapsyrmasyna sáıkes, 2023 jyly 23 sáýir Ulttyq kitap kúni bolyp bekitildi. Osyǵan oraı «Ulttyq kitap» baıqaýy jarııalandy. Kelesi jyly Jumysshy mamandyqtary jyly aıasynda «Erlik pen eńbek dastany» atty baıqaý uıymdastyrylady. Bul bastama eńbek adamdarynyń mańyzyn arttyrýdy kózdeıdi. Sonymen qatar «Aıboz» ulttyq ádebı syılyǵy bıyl da jalǵasyn tabady. О́tken jyly bul syılyqqa 7 atalym boıynsha buryn jarııalanbaǵan 176 týyndy usynylǵan edi.
