Ulttyq ǵarysh ortalyǵynyń aýmaǵynda Qazaqstan tarapy jerdi qashyqtan zondtaý jáne ǵarysh monıtorıngi salasyndaǵy otandyq ǵalymdardyń ázirlemelerin usyndy. Tabıǵı resýrstardy basqarý, agroónerkásip keshenderdiń jaı-kúıin baqylaý, tótenshe jaǵdaılarǵa den qoıý jáne ruqsat etilmegen polıgondardy anyqtaý maqsatynda atalǵan tehnologııalardy qoldaný múmkindikteri kórsetildi.
Sıfrlyq keńsede qyrǵyz delegasııasyna memlekettik qyzmetterdiń tıimdiligin arttyrýǵa jáne ozyq sıfrlyq sheshimderdi engizýge baǵyttalǵan bastamalar tanystyryldy. Máselen, «Áleýmettik ámııan» jobasy azamattardyń jekelegen sanattaryna proaktıvti formatta ataýly memlekettik qoldaý alýǵa múmkindik beredi. Halyqtyń áleýmettik ál-aýqatynyń deńgeıi týraly málimetter «Otbasynyń sıfrlyq kartasy» aqparattyq júıesinde jınaqtalady. Saraptama aımaqtyq deńgeıde júrgiziledi, bul ár sala úshin naqty usynystar jasaýǵa múmkindik týdyrady. Búgingi tańda júıede 6 mln-nan asa otbasy sıfrlandyryldy. Olardyń ál-aýqatyn taldaý 100-den asa kórsetkish negizinde júrgizildi.
Memlekettik basqarýdyń ashyqtyǵyn arttyrý úshin jasandy ıntellekti paıdalaný boıynsha tájirıbe almasyldy. eOtinish azamattar men bıznestiń ótinishterin qabyldaý, óńdeý jáne taldaýdyń biryńǵaı platformasy, eNotary notarıattyq aqparattyq júıesi, sondaı-aq ázirleýshiler men memlekettik organdarǵa JI sheshimderin negizgi salalarǵa biriktirýge múmkindik beretin Ulttyq jasandy ıntellekt platformasy tanystyryldy.
Úderisterdi avtomattandyrýǵa jáne memlekettik ákimshilendirýdiń tıimdiligin arttyrýǵa yqpal etetin ınnovasııalyq bastamalardy iske asyrý tájirıbesi atap ótildi. Qazirgi ýaqytta eGov elektrondyq úkimetiniń mobıldi qosymshasyn paıdalanýshylar sany – 10 mln-ǵa jetti. Servıs arqyly azamattarǵa 1 myńǵa jýyq qyzmet túri qoljetimdi, olar arqyly 72 mln qyzmet kórsetildi.
