Foto: N.Baıbýlın
Otyrys barysynda eki oqylymda qaralǵan «Qazaqstan Respýblıkasynyń keıbir zańnamalyq aktilerine rezervtegi áskerı qyzmet jáne jekelegen ortalyq memlekettik organdardyń fýnksııalaryn qaıta bólý máseleleri boıynsha ózgerister men tolyqtyrýlar engizý týraly» zań Qarýly Kúshterdi, basqa da áskerler men áskerı quralymdardy rezervtik kúshtermen qamtamasyz etý úshin quqyqtyq negiz qurýǵa baǵyttalǵan.
«Zań rezervtegi áskerı qyzmetti ótkerýdiń quqyqtyq negizderi men sharttaryn qalyptastyrýdy kózdeıdi. Osy maqsatpen «rezervtegi áskerı adamdardyń» mártebesi, olardyń quqyqtary men mindetteri aıqyndaldy. Áskerı qyzmetin rezervte ótkeretin azamattardy áleýmettik qamsyzdandyrý máselesi de rettelip otyr. Maquldanǵan zań Qarýly Kúshterimizdiń áleýetin jáne elimizdiń qorǵanys qabiletin arttyrýǵa oń yqpalyn tıgizedi dep senemiz», dedi Palata Tóraǵasy.
Zań arqyly azamattardyń rezervtegi áskerı qyzmet ótkerý merzimi men tártibi, olardyń quqyqtary men mindetteri jáne qoıylatyn talaptar men shekteýler belgilenedi. Naqty aıtqanda, arnaýly memlekettik jáne quqyq qorǵaý organdarynda qyzmet ótkeretin, vahtalyq ádispen ne aýysymdyq jumysta isteıtin azamattar rezervtegi áskerı qyzmetke qabyldanbaıdy. Budan basqa, zańda áskerı qyzmetshilerge 2016 jylǵy 1 qańtardan bastap taǵaıyndalǵan eńbek sińirgen jyldary úshin zeınetaqy tólemderin jyl saıynǵy ındeksteý jónindegi normalar qarastyrylǵan. Sondaı-aq jetkilikti eńbek sińirgen jyldary bar kúshtik qurylymdardyń qyzmetkerlerine kelisimshart merzimi ótkennen keıin zeınetaqy tólemderine quqyq beriledi.
Sonymen qatar Palata otyrysynda senatorlar «Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy Qazaqstan Respýblıkasy men Reseı Federasııasynyń birtutas energetıkalyq júıeleriniń qatar jumys isteýin qamtamasyz etý jónindegi sharalar týraly kelisimdi ratıfıkasııalaý týraly» zańdy qarap, maquldady. Kelisimdi ratıfıkasııalaý Qazaqstan men Reseıdiń energetıkalyq júıeleriniń qatar jumys isteýin qamtamasyz etýge, elektr energetıkasy salasyndaǵy ózara tıimdi yntymaqtastyqty odan ári keńeıtýge jáne Qazaqstannyń energetıkalyq júıelerindegi retteýshi qýattardyń tapshylyǵyn azaıtýǵa múmkindik beredi.
Sondaı-aq Senat depýtattary «Birikken Ulttar Uıymynyń bólýdi baqylaý jónindegi kúshterine (UNDOF) resýrs usynatyn Qazaqstan Respýblıkasynyń Úkimeti men Birikken Ulttar Uıymy arasyndaǵy ózara túsinistik týraly memorandýmdy ratıfıkasııalaý týraly» jáne «2024 jylǵy 14 aqpandaǵy Birikken Ulttar Uıymynyń bólýdi baqylaý jónindegi kúshterine (UNDOF) resýrs usynatyn Qazaqstan Respýblıkasynyń Úkimeti men Birikken Ulttar Uıymy arasyndaǵy ózara túsinistik týraly memorandýmǵa hattar almasý nysanyndaǵy kelisimdi ratıfıkasııalaý týraly» zańdardy qarap, maquldady.
Talqylaý kezinde atap ótilgendeı, bul Kelisimderdi ratıfıkasııalaý Qazaqstanǵa BUU-nyń turaqty ári senimdi seriktesi retinde halyqaralyq bitimgershilik mıssııasyna qosylýǵa jáne oǵan óz úlesin qosýǵa jol ashady. Memorandýmdar Qazaqstan Respýblıkasynyń bitimgershilik qyzmetiniń quqyqtyq jáne uıymdastyrýshylyq negizderin belgileıdi, personaldy, tehnıkany jáne materıaldyq qamtamasyz etýdi berý tártibin, sondaı-aq, qarjylandyrý jáne shyǵyndardy óteý tetigin aıqyndaıdy. Qujattar UNDOF quramyndaǵy qazaqstandyq áskerı qyzmetshilerdiń mártebesin, olardyń tártiptik jáne qylmystyq jaýapkershiligi men mindettemelerdiń oryndalýyn baqylaý sharalaryn bekitedi. Memorandým aıasynda BUU Qazaqstan Respýblıkasynyń mıssııaǵa qatysýyna baılanysty shyǵystardy óteýge mindetteme alady.
Otyrys kezinde senatorlar ózekti máselelerge qatysty depýtattyq saýaldaryn da joldady.
Andreı Lýkın kóktemgi sý tasqyny maýsymynyń jaqyndaǵanyna nazar aýdaryp, eldegi gıdrotehnıkalyq nysandardyń apatty jaǵdaıyna alańdaýshylyq bildirdi. Osyǵan baılanysty depýtat jaǵdaıdy jaqsartýǵa arnalǵan sharalardy usyndy.
Darhan Qydyráli halyqaralyq standarttarmen salystyrǵanda otandyq áskerı bilim berý júıesi eskirgenin aıtyp, atalǵan baǵyttaǵy ózekti problemalardy kóterdi. Senator bul salany jetildirip, zamanaýı tehnologııalar boıynsha mamandar daıarlaý úshin qysqa merzimdi áskerı kýrstar ashý qajet ekenin atap ótti.
Rýslan Rústemov Qyzylorda oblysyndaǵy ekologııalyq ahýaly qolaısyz aýdandardy aýyz sýmen qamtamasyz etýge qatysty túıtkilderge toqtaldy. Máselelerdi tıimdi sheshý úshin ol Úkimetti qosymsha qarjy bólýge, onyń ishinde aýyldardy toptyq sý qubyry jelisine qosýǵa jáne basqa da mańyzdy jobalardy júzege asyrýǵa shaqyrdy.
