Ertis boıynda ekopark salynady

Bıyl Pavlodardaǵy Ýsolka shaǵyn aýdanynda ekoparktiń qurylysy bastalady. Ýsolka ózeniniń jaǵasynda ornalasqan toǵaı arasyn kún jyly mezgilde teris ómir saltyn ustanatyndar, qańǵybastar jaılap, únemi kúl-qoqys shashylyp jatatyn. Ekologterdiń dabyl qaǵýymen park jobasy qabyldanyp, endi jurtshylyq onyń tez arada júzege asýyn asyǵa kútip otyr.

– Bıyl oblys ákiminiń tapsyrmasy boıynsha aýqymdy joba – Ýsolka shaǵyn aýdanynda ekopark salý jumystaryn bastaǵaly otyrmyz. Qalany aralaý barysynda ekopark salynatyn aýmaqty tekserip shyqtym. Alda qolǵa alynatyn jumystar týraly baıandamalaryn tyńdadym. Merdigerge qoıylatyn negizgi talap – tabıǵatqa barynsha az áser etý, ekologııalyq materıaldardy paıdalaný. Jalpy alǵanda, shamamen alpys gektardy quraıtyn aýmaqta qurylys-montaj jumystaryn bas­tamas buryn, sý basýdyń aldyn alý maqsatynda uzyndyǵy 2,2 km bolatyn dambany nyǵaıtý qajet. Bul jumystarǵa aqpan aıynyń sońǵy onkúndiginde kirisip, Ertis ózeniniń sýy tasyǵanǵa deıin aıaqtaýdy tapsyrdym, –dedi Pavlodar qalasynyń ákimi Hasar Habylbekov.

Parkte shamamen 30 gektardaı­ kógal jabyny, 10 sýlandyrý júıesi bolady. Jaıly oryndyqtar, jaıaý júrginshiler joly, balalarǵa ar­nalǵan oıyn alań­dary, ana men bala bólmesi, dárethana qarastyrylǵan.

Buǵan qosa jergilikti bılik bıylǵy kóktemde qansorǵysh ján­dikterge qarsy kúresti kúsheıte túspek nıette. Oblysta shybyn-shirkeıge qarsy 172 myń gektar alqap óńdeledi. Áýeden óńdeý sharalarynyń aıasy bıyl birden 45 myń gektarǵa ulǵaıyp otyr. Osyǵan oraı qosymsha ushaqtar men tehnıkalar tartý kózdelgen. Dezınseksııa jónindegi jumystar 2024 jyly jasalǵan úsh jyldyq kelisimsharttyń aıasynda jalǵasady. Pavlodar qalasynyń 32 myń gektar jaıylma aýmaǵyn, Aqsý qalasynda, Pavlodar aýdanynda 30 myń gektar, Tereńkól, Aqtoǵaı aýdandarynda 20 myń gektar, Ertis aýdanynda 40 myń gektar jaıylma alqabyn qamtý josparlanǵan. Aıta ketelik, byltyr Pavlodarda shybyn-shirkeıge qarsy ýlaý jumystary shildeniń ortasyna deıin jalǵasqan edi.

«Oblys ákimi Asaıyn Baıhanov áýeden óńdeletin alqaptyń kólemin ulǵaıtýdy eskere otyryp, qosymsha tehnıkany tartý qa­jet­tigin atap ótti. AN-2 markaly 8 ushaqqa verıfıkasııadan keıin taǵy eki bort kelýi kerek. Sondaı-aq tos­qaýylmen óńdeý kezinde qoldanylatyn eki aerozoldi retteletin dıspersııa genera­to­ryna taǵy ekeýi qosylady. Olardyń ár­qaı­sysynyń qamtý qashyqtyǵy – 500 metr­ge, syıymdylyǵy – 1500 lıtrge deıin. Qol­danylatyn preparattyń kólemi propor­sıonaldy túrde 14,5 myń lıtr­ge deıin artady. Baıer preparattarynan basqa, polıak óndirisiniń jańa jetildirilgen qu­ral­daryn qoldaný josparlanyp otyr. Olar naýryzdyń ekinshi onkúndiginde jet­ki­ziledi», dep habarlady oblys ákiminiń bas­pasóz qyzmetinen.

Qazgıdromettiń boljamy boıyn­sha, bıyl Pavlodarǵa kóktem erte kele­di. Aýanyń temperatýrasy normadan 2 gradýs­qa joǵary bolady. Búginde Buqtyrma sý qoı­masynda 38 tekshe kılometr sý bar. Bul ótken jyldyń osy keze­ńimen salys­tyr­ǵanda 8,6 tekshe kılo­metrge artyq. Buqtyrma, Shúlbi sý qoımalaryna keletin sý kóle­miniń boljamdy aǵyny ortasha kóp­jyl­dyq mánderden 15-ten 40%-ǵa deıin joǵary.

Pavlodar oblysy