Májilis spıkeri, «Amanat» partııasynyń tóraǵasy Erlan Qoshanov bastaýysh partııa uıymdary partııanyń negizgi tiregi ekenin atap ótti. Olar partııanyń qoǵamdaǵy bedelin qalyptastyrady. Halyq suranysyna alǵashqylardyń biri bolyp ún qatyp, áleýmettik máselelerdi sheshýge kómektesedi, partııalyq jobalarǵa belsendi qatysyp, memlekettik bastamalardy túsindirý jumysyn júrgizedi. Al partııanyń qoǵamdyq qabyldaý bólmelerine kelip túsetin ótinishter sany jyl sanap artyp keledi. Bul azamattardyń «Amanat» partııasyna degen joǵary seniminiń jarqyn kórinisi.
– Bizdiń partııa Memleket basshysynyń strategııalyq baǵytyn belsendi júzege asyryp, naqty ister arqyly Prezıdenttiń naǵyz qoǵamdyq tiregi ekenin kún saıyn dáleldep keledi. Elimizde júrgizilip jatqan reformalar partııalyq júıeniń damýyna serpin berip, saıası básekelestikti kúsheıte tústi. Jańa jaǵdaıda «Amanat» partııasy barlyq bılik deńgeıinde óz kóshbasshylyǵyn sátti saqtap keledi. Buǵan bastaýysh partııa uıymdary orasan úles qosyp otyr. Bizdiń belsendilerimiz elimizdiń barlyq aýmaǵynda ortaq maqsat pen ıgi is jolynda kúndiz-túni jumys istep keledi. Olar – partııanyń negizgi qozǵaýshy kúshi ári aldaǵy jeńisteriniń kepili, – dedi ol.
Sondaı-aq Erlan Qoshanov azamattardyń naqty máselelerin sheshýge baǵyttalǵan partııalyq jobalardyń joǵary suranysqa ıe ekenin atap ótti. Prezıdent «Aýyl amanaty» jáne «Qaryzsyz qoǵam» jobalaryn joǵary baǵalady. Qoǵam tarapynan úlken qoldaý tapty. Bul jobalar aýyldaǵy kásipkerlikti damytýǵa jáne azamattardyń qarjylyq saýatyn arttyrýǵa kómektesedi. «Jer amanaty» jobasy paıdalanylmaı jatqan 12 mln gektar jerdi memleket menshigine qaıtarýǵa múmkindik berdi. Al partııanyń jańa «Sıfrlyq qoǵam» jobasy azamattardyń sıfrlyq saýatyn arttyrýǵa jáne olardy ınternet-alaıaqtardan qorǵaýǵa baǵyttalǵan.
Sonymen qatar partııanyń «Halyqpen birge!» saılaýaldy baǵdarlamasy júıeli júzege asyrylyp, halyqtyń turmysyn jaqsartyp jatyr. Bul – «Amanat» partııasy men Úkimet atqaryp jatqan jumystyń negizgi basymdyqtarynyń biri. Saılaýaldy ýádelerdi oryndaý aıasynda 400 myńnan asa jas azamat jumysqa ornalastyryldy, joǵary oqý oryndaryndaǵy stýdentterdiń shákirtaqysy 80%-ǵa ulǵaıtyldy, 270 medısınalyq mekeme, 375 myń oqýshyǵa arnalǵan 254 mektep salyndy. Aýylǵa jumys isteýge barǵan medısına qyzmetkerlerine 10 mln teńgege deıin kótermeaqy tólenip, zııandy eńbek jaǵdaıynda jumys isteıtin mamandarǵa arnaıy tólemder qarastyryldy.
Sondaı-aq partııa tóraǵasy Memleket basshysynyń «Taza Qazaqstan» bastamasyn iske asyrý, eńbek adamdaryna qoldaý kórsetý jáne Jumysshy mamandyqtary jyly sheńberinde jumysshy kadrlardy daıarlaý, aldaǵy Jeńistiń 80 jyldyǵyn merekeleý boıynsha BPU-nyń belsendi jumys isteýiniń mańyzyna toqtaldy.
Erlan Qoshanov partııa árqashan halyqtyń janynan tabylýy kerek ekenin atap ótti. Ol qoǵamdyq qabyldaý bólmeleriniń jumysyn kúsheıtýge shaqyryp, iri kásiporyndar men óndiris oryndarynda kóshpeli formatta azamattardy qabyldaýdy usyndy. Mundaı tásil turǵyndardy tolǵandyrǵan máselelerdi jedel, tikeleı sol jerde sheshýge jáne halyqpen barynsha tıimdi ózara qarym-qatynas ornatýǵa múmkindik beredi.
Kezdesýde BPU-nyń oń tájirıbeleri atalyp ótti. Batys Qazaqstan oblysyndaǵy «Aqsaıgazservıs» bastaýysh partııa uıymy sý tasqynynan zardap shekken azamattarǵa arnap óz qarajaty esebinen 42 turǵyn úı saldy. Atyraý oblysyndaǵy belsendiler uzyndyǵy 21 shaqyrymdy quraıtyn bóget turǵyzyp, óńirdi sý basýdan saqtap qaldy. Mundaı mysaldar BPU-nyń joǵarydan nusqaý berýdi kútpesten, qıyn jaǵdaıda adamdarǵa árdaıym kómekke kelýge daıyn naqty kúsh ekenin dáleldeıdi.
Budan soń, baıqaý qorytyndysy jarııalandy. Qazylar alqasynyń sheshimimen Almaty oblysyndaǵy «Fırma «Bent» BPU, Astanadaǵy «Balalardy ońaltýdyń ulttyq ortalyǵy» KeAQ BPU jáne Shymkenttegi «Bilim jáne ǵylym» BPU úzdik bastaýysh partııa uıymy retinde tanyldy. Al qoǵamdyq qabyldaý bólmeleri arasynda partııanyń Túrkistan oblystyq fılıalynyń qoǵamdyq qabyldaý bólmesi men partııanyń Almaty qalasy Alataý aýdandyq fılıalynyń qoǵamdyq qabyldaý bólmesi jeńiske jetti. Sondaı-aq halyqqa zańgerlik kómek kórsetýge baǵyttalǵan «Quqyqtyq kómek» jobasyn júzege asyrýda erekshe jetistikke jetken partııanyń Soltústik Qazaqstan oblystyq fılıaly men partııanyń Atyraý oblysy Qurmanǵazy aýdandyq fılıalynyń qoǵamdyq qabyldaý bólmeleri úzdik dep tanyldy.
Sonymen qatar «Amanat» partııasynyń tóraǵasy túrli salada eńbek etip júrgen elimizdiń 16 belsendi azamatyna partııa bıletin tabystady. Olardyń qatarynda Qazaqstannyń eńbek sińirgen qaıratkeri, jazýshy-dramatýrg, Memlekettik syılyqtyń laýreaty Roza Muqanova, Dúnıejúzi qazaqtary qaýymdastyǵy tóraǵasynyń orynbasary Ádilbek Alpysbaı, Qazaqstan taekvondo federasııasynyń vıse-prezıdenti Qaırat Dúısenov, «Astana Opera» teatrynyń solısi Nazym Saǵyntaı, «Altyn dombyra» aıtysynyń jeńimpazy, aıtysker aqyn Meıirbek Sultanhan, ınjener-energetık Azamat Tabarov, metallýrg Ivan Belkov jáne basqa da azamattar bar.
