«ProfHım» JShS qyzmetiniń negizgi baǵytynyń biri – turmystyq hımııa ónimderiniń keń spektrin shyǵarý. Olardyń ishinde «VOKA» brendindegi 120 túrli suıyq sabyn, sondaı-aq ydys, kólik jýýǵa arnalǵan, turmysta keń qoldanatyn hımııalyq ónimderdi óndirýge basymdyq beredi.
Quryltaıshysy Vladımır Mıronenko bastapqyda kvazısektordaǵy kompanııalardyń birinde jumys istedi. Keıin bıznestiń ártúrli segmentinde baǵyn synap júrgen, bala kúnnen birge ósken dosynyń keńesimen Qytaı men Reseıden sýsabyndy, sabyndy, turmystyq hımııa suıyqtyqtaryn tasýmen aınalysty. Sóıtip júrip óndiristi kózben kórdi. Dúken sóreleriniń belin qaıystyryp turǵan ónim túrleriniń túp negizi bir shıkizattan daıyndalatynyn, qospalary arqyly ǵana bir-birinen erekshelenetinin kórgende «nege osyny ózimiz daıyndamasqa» degen oıǵa keledi.
Qoldaǵy jıǵan-tergenine qalanyń shetkeri aımaqtarynyń birinen eski ǵımaratty satyp aldy: qural jabdyq, óndiristik jeli úshin ekinshi deńgeıli bankterdiń birinen 14 paıyzben 86 700 000 teńge nesıe aldy. Onyń 8 paıyzyn «Damý» qory sýbsıdııalap berdi. Qazir zaýytta bir aýysymmen jumys isteıtin 15 jumysshy bar. Kásipkerdiń aıtýynsha, ydys-aıaq, kólik quraldaryn jýýǵa arnalǵan shıkizat Shvesarııadan bóshkemen, qappen jetkiziledi. О́nimniń sapaly shyǵýy sol shıkizattyń qajetti mólsherde qoldanylýyna baılanysty. Jumys tolyǵymen avtomattandyrylǵan.
О́ndiristiń kelesi kezeńi shıkizatty aralastyryp, eń joǵary temperatýrada qaınatýmen jalǵasady. Qaınatylǵan suıyqtyqty qoımaljyń kúıge túskenshe kemi 5–6 saǵat shaıqaıdy. Sodan keıin oǵan ádemi tús pen ıis berý úshin arnaıy qospalarmen aralastyrady. Bul úderis te tórt saǵatqa sozylady. Sodan keıin taǵy da tekserýden ótip, arnaıy qutylarǵa quıylyp, tańbalanyp, qoımaǵa jiberiledi. Munda da jumys úderisi tehnologterdiń jiti baqylaýynda. Suıyqtyqqa paıdalanatyn qospalar qajetti mólsherden kem bolsa, ol sapasyn tekseretin tehnolog-robottyń súzgisinen ótpeı qalady. Zaýyttyń áleýeti táýligine 20 tonna tazalaǵysh suıyqtyqtaryn daıyndaýǵa jetedi.
Qazir «VOKA» brendindegi ónimderge suranys ósip keledi. Tapsyrys berýshiler – «HoReCa», qonaq úı segmenti, turmystyq qyzmet segmenti, dámhanalar, balalar úıleri. Al ózge iri jelilik saýda úıleriniń esigi bular úshin jabyq.
«Ydys, kólik jýýǵa arnalǵan hımııalyq ónimder shyǵaratyn zaýyttardyń bári shıkizatty Shveısarııadan aldyrady. Qytaı nemese Reseı taýarlary quramynyń 80%-y óz elderinde shyǵatyn hımııalyq qospadan daıyndalǵandyqtan, olarmen baǵa jóninen básekelese almaımyz. Al bizdiń ónimderdegi qospanyń 90%-y – ımport. Sý ǵana ózimizdiki. Biraq sapa jaǵynan básekege qabilettimiz», deıdi.
Vladımır Mıronenko aıtyp ótkendeı, otandyq óndiristiń damýyna búkil el bolyp múddeli bolýymyz kerek. Onsyz ekonomıkanyń órisi keńeımeıdi.
«Ashyq naryqta júrgenimizge segiz jyl. Biraq keıde keıbir saýda úıleriniń basshylary kelip, «qutynyń syrtyna shetelden keletin taýar túriniń japsyrma qaǵazyn japsyr da, ishine ózderiń daıyndaǵan hımııalyq suıyqtyq quıyp bershi» dep ótinish aıtady. Olarǵa sapa emes, brend kerek ekenin túsinemin. Tutynýshynyń kózi úırenip qalǵan taýarǵa túsedi. Keıde klıentter aldynda naryqta sheteldik brend retinde tanylǵan ónim túri men óz ónimderimizdi bos qutyǵa quıyp, synaqtan ótkizemin. Mundaıda tańdaý bizdiń ónimderimizge túsedi», deıdi óndiris basshysy.
Aıtýynsha, naryqtyń osy segmenti kontrabandalyq taýarlarǵa tolyp ketken. Halyqaralyq naryqta brend ataýy bar ónim túrleri jertóledegi jasyryn sehtarda quıylýy múmkin. Mysaly, jurtshylyq arasynda tanymal tazartqysh untaq shyǵaratyn sheteldik zaýyttyń jumysyn toqtatqanyna birer jyl bolyp qaldy. Biraq taýarlary qara bazarda, dúkenderde tolyp tur.
«Turmysta keń qoldanatyn hımııalyq suıyqtyqtardyń daıyndalý úderisi óte kúrdeli. Keıbir qospa túrlerin qandaı kólemde salý kerektigin tek mamandar ǵana sheshedi. Tipti ıistendirgish, túriniń árin keltiretin qospalardyń ózi mamandardyń baqylaýymen ǵana anyqtalady. Al kóleńkeli ımportpen keletin nemese jertólede daıyndalatyn ónimderdiń quramyna eshkim kepildik bere almaıdy. Teri, ishki qurylys aýrýlarynyń kóbeıip ketýine osy faktor da áser etýi múmkin», deıdi.
«ProfHım»-niń tapsyryssyz, toqtap turǵan kúni joq. Jyldyq aınalym – 600 mln teńge. Jumysshylar jalaqysy 300 myń teńgeden bastalady. Zaýyttaǵy jumys úderisiniń 30 paıyzy avtomattandyrylǵan.
«О́nimderimiz az kólemde bazarlarda satylady. Qaladaǵy iri saýda jelilerinde satylmaǵandyqtan, zaýyt janynan óz dúkenimizdi ashtyq. Aldaǵy ýaqytta suıyqtyq quıatyn ydystardy da ózimizde daıyndaǵymyz keledi. Josparymyz – naryq suranysynyń 10 paıyzyn baǵyndyrý. О́nim túrlerin kóbeıtýge, baǵyt-baǵdarymyzdy ártaraptandyrýǵa da áleýetimiz jetedi. Bizge tek naryqtyń senimi jáne halyqtyń qoldaýy qajet. Qalǵan máseleni ózimiz retteımiz», deıdi kásip ıesi.
ALMATY
