Qazaqstan halqy Assambleıasynyń bastamasymen qoıylǵan monýment bıiktigi 14 metrge tartady. Onyń basty elementi – qolyna nan ustap turǵan áıel músini. Tarıhqa kóz júgirtsek, 1930–1952 jyldary qazaq jerine túrli etnos ókilderi kúshtep jer aýdaryldy. Qıly kezeńde mıllıondaǵan adamǵa jańa ortaǵa beıimdelý qıynǵa soqty. Alaıda qazaq halqy jatsynbaı, qolyndaǵy barymen bólisip, qamqorlyq jasap, úıine panalatty. Monýmenttegi beıne sol qazaq halqynyń keńpeıildiligin, qonaqjaılyǵyn jáne qıyn-qystaý kezeńde deportasııalanǵan ózge etnos ókilderine kórsetken janashyrlyǵyn bildiredi. Al eskertkishtiń negizgi bóliginde shańyraq beınelengen. Bul – Qazaqstan san etnostyń ortaq shańyraǵyna aınalyp, búginde el halqy beıbitshilikte, birlikte, yntymaqtastyqta ómir súrip jatyr degendi aıǵaqtaıdy. Tómengi jaqtaýyna latyn tilinde «Qazaq eline myń alġys» dep jazylǵan.
