Palata spıkeri óz sózinde tórtinshi kezeń túlekterine iltıpat bildirip, joba eldiń taldamalyq áleýetin damytý jolynda aıryqsha mańyzǵa ıe ekenin aıtty. Sondaı-aq ol analıtıka men sıfrlyq tehnologııalar ekonomıkanyń, memlekettik saıasattyń jáne bıznestiń ilgerileýin anyqtaıtynyn, al jańa bilim qatysýshylarǵa tıimdi sheshim qabyldaýǵa septigin tıgizetinin atap ótti.
Tórtinshi kezeńniń qorytyndy kúninde komandalar ázirlegen baıandamalaryn tanystyrdy. Olardyń úzdikterin sarapshylar men túlekterdiń ózderi anyqtady. Baıandamalardyń taqyryptary bilim berýdegi ınklıýzııa, genderlik teńgerim, zań shyǵarý qyzmetindegi jasandy ıntellektiń róli, Ortalyq Azııadaǵy ornyqty damý sııaqty ózekti máselelerdi qamtıdy. Qorytyndy materıaldar tórtinshi kezeńniń taldaýlar jınaǵynda jarııalanyp, Parlament depýtattaryna, sondaı-aq saraptamalyq usynym retinde salalyq memlekettik organdarǵa joldanady.
«Birneshe aptaǵa jalǵasqan oqý kezinde sizder jeti negizgi baǵyt boıynsha toptyq baıandamalar daıarladyńyzdar. Olardyń bári Qazaqstannyń strategııalyq múddelerin kózdeıdi jáne Prezıdent Qasym-Jomart Toqaev aıqyndap bergen baǵdardyń kún tártibimen úndes. Osy baǵyttar boıynsha ózderińiz analıtıkalyq materıaldardyń taqyryptaryn usyndyńyzdar. Sizderdiń jumystaryńyzdy taldaı otyryp, biz tek túpkilikti nátıjeni emes, sonymen qatar daıyndyq úderisin, ıaǵnı derekterdi jınaý men taldaýdan bastap, tujyrymdar men usynystardy dáleldeýge deıingi eńbekterińizdi baǵaladyq. Osy rette bıyl baıandamalardyń deńgeıi aıtarlyqtaı joǵary ekenin atap ótkim keledi. Jan-jaqty izdenispen ázirlengen ozyq jumystar men áli de jetildirýdi qajet etetin materıaldar arasyndaǵy alshaqtyq qysqarǵan. Bul baıandamalardy daıyndaý sapasynyń artqanyn jáne qatysýshylardyń taqyrypty tereń túsingenin kórsetedi», dedi M.Áshimbaev.
Aıta keteıik, bıyl Mekteptiń tórtinshi kezeńine qatysýǵa ótinim bergenderdiń qatary kóp boldy. Naqty aıtqanda, bir orynǵa 12 adamnan keldi. Bul – joba tarıhyndaǵy eń joǵary kórsetkish. Sondaı-aq mundaı úrdis jas mamandardyń analıtıkalyq tásilderdi meńgerip, óz qabiletterin shyńdaı túsýge degen qyzyǵýshylyqtyń artyp kele jatqanyn bildiredi. Kezeń aıasynda 14 komanda quryldy. Qatysýshylarmen 32 dáris oqýshy jáne 15 mentor jumys istedi. Odan bólek tyńdaýshylar bıznes-lanch formatynda túrli memlekettik organdardyń basshylarymen de kezdesti. Dáristerdiń jalpy kólemi 60 saǵattan asady. Bıyl joba kezinde óńirlerdiń qamtylýyna da basa mán berildi. Sonyń nátıjesinde oblystardan kelgen qatysýshylar sany úsh esege artty.
«Data-driven decision-making-tegi taldaý jáne sıfrlyq tetikter» osy kezeńniń negizgi taqyryby boldy. Búginde kompanııalar men memlekettik qurylymdar analıtıkalyq platformalarǵa jáne derekterge negizdelgen sheshimderdi qoldaný arqyly tıimdilikke qol jetkizýdi kózdeıdi. Ulttyq banktiń, Otbasy bankiniń, Ulttyq statıstıka bıýrosynyń tájirıbelerinen derekterge negizdelgen osyndaı taldaýlar kóp deńgeıde qoldanylatynyn jáne qajet ekenin kórdińizder. Oqý barysynda sizder jańa nárseni úırenip, komandalyq qabiletti damytyp qana qoımaı, kásibı baılanysty nyǵaıtyp, seriktester taýyp, basqa mamandarmen aldaǵy yntymaqtastyqtyń berik negizin qaladyńyzdar. Munyń bári – ózderińiz úshin mol kapıtal. Osy jobadan keıin de onyń ıgiligin kóresizder dep senemin», dedi Senat tóraǵasy.
Sondaı-aq palata spıkeri mektep túlekteri Qazaqstanda analıtıkanyń damýyna eleýli úles qosatynyna, al atalǵan joba tek bilim berý kýrsy emes, eldiń bolashaǵy úshin jumys isteıtin kásibı saraptamalyq qoǵamdastyqty qalyptastyratyn alańǵa aınalatynyna senim bildirdi.
Sonymen qatar qatysýshylarǵa Nazarbayev University prezıdenti Vakar Ahmad «Evidence-based policy jáne akademııalyq qoǵamdastyqtyń róli» atty dáris oqydy. Ol óz dárisinde memlekettik saıasatty qalyptastyrý úderisinde derekterdi sapaly taldaýdyń mańyzy zor ekenin aıtty.
Dástúrge sáıkes Taldaý mektebiniń tórtinshi kezeńindegi dáristerdiń vıdeonusqasy Mekteptiń resmı YouTube-arnasynda jarııalanady.
