AQTО́BE. 19 maýsym. Aqtóbe oblystyq ishki ister departamentinde Qazaqstan polısııasy kúni qarsańynda «Meniń Qazaqstanym. Meniń polısııam» atty balalardyń shyǵarmashylyq baıqaýy uıymdastyryldy. Bul baıqaýǵa oblystyń ishki ister organdary qyzmetkerleriniń 3-13 jas aralyǵyndaǵy balalary qatysty. Bul týraly egemen.kz tilshisi habarlady.
Baıqaýdyń basty maqsaty – jas urpaqtyń boıynda Qazaqstan polısııasyna degen qurmetti qalyptastyrý, balalardy otansúıgishtikke, óziniń ata-anasyn maqtan etýge baýlý jáne eń bastysy, memlekettik tildi bilý men qurmetteýge tárbıeleý.
«Meniń Qazaqstanym. Meniń polısııam» baıqaýy balalardyń jas erekshelikterin eskere otyryp, eki baǵytta ótkizildi. Birinshi baǵyt boıynsha 3-10 jastaǵy balalar ózderiniń salǵan sýretterin usynsa, ekinshi baǵyt boıynsha 6-13 jastaǵy jetkinshekter ózderi jazǵan shyǵarmalaryn tapsyrdy.
Balalardyń jumystaryn qabyldaý sáýir aıynyń ortasynan bastalyp, 1 maýsym – balalardy qorǵaý kúni qarsańynda aıaqtaldy. Baıqaýǵa barlyǵy 30 bala qatysty. Polısııa qyzmetkerleriniń balalary usynǵan árbir sýrette olardyń Otanǵa, týǵan jerine degen súıispenshiligi aıqyn kórinse, jazǵan shyǵarmalarynda polısııa qyzmetkeri bolyp jumys isteıtin ata-analaryna degen qurmeti, maqtanyshy ańǵarylady.
Baıqaý oblystyq deńgeıde ótkizilgendikten, oǵan barlyq qalalyq, aýdandyq polısııa bólimderinde qyzmet etetin polıseılerdiń balalary da qatysty. Ásirese, Shalqar, Temir, Áıteke bı aýdandarynda qyzmet etetin polısııa qyzmetkerleriniń balalary belsendilik tanytty.
Saıys qorytyndysyn shyǵaryp, jeńimpazdardy anyqtaý jáne qatysqan ár balany nazardan tys qaldyrmaýdy oblystyq ishki ister departamentiniń bastyǵy, polısııa general-maıory Mahsýdhan Ablazımovtiń ózi mindetine alyp otyr. Onyń tóraǵalyǵymen ótken komıssııa otyrysynda balalardyń jumystary saralanyp, talqylandy. Sondaı-aq, balalardyń týyndylaryn barynsha obektıvti baǵalaý úshin komıssııa quramynda jýrnalıster, tilshiler, oblystyq tilderdi damytý basqarmasynyń, qaladaǵy Qazanǵap atyndaǵy balalar óner mektebiniń mamandary da boldy.
Baıqaý qorytyndysy boıynsha júldeli oryndar men bes nomınasııa taǵaıyndaldy. Onyń ishinde eń kishkentaı qatysýshylar da nazardan tys qalǵan joq. Olarǵa «Eń kishkentaı ónerpaz», «Talaby taýdaı balapan» t.b. nomınasııalar belgilendi. Saltanatty marapattaý rásimi 23 maýsym – Qazaqstan polısııasy kúnine arnalǵan merekelik konsertte ótedi. Qatysýshy balaqaılardyń barlyǵyna oblystyq departament bastyǵynyń maqtaý qaǵazdary men alǵys hattary, syılyqtar tabystalady.
Satybaldy Sáýirbaı.
Derek, sýret: egemen.kz.
