Foto: Mereı Qaınaruly
«Joba aıasynda medısınalyq mekemelerdi zamanaýı jabdyqtarmen qamtamasyz etýge erekshe kóńil bólinip jatyr. 2023-2024 jyldary oblystaǵy aýyldyq aýrýhanalar men ambýlatorııalarǵa 1076 jańa tehnıka, sonyń ishinde kompıýterlik tomograftar, ÝDZ apparattary jáne dıagnostıkalyq qural-jabdyqtar satyp alyndy. Bul shalǵaı eldi mekenderdegi dıagnostıka men emdeý sapasyn aıtarlyqtaı jaqsartýǵa múmkindik beredi», dep atap ótti Aınash Qapanova.
Sondaı-aq, aýrýhanalar men emhanalarda kúrdeli jóndeý jumystary jalǵasqan. 2024 jyly bes medısınalyq mekeme, sonyń ishinde ambýlatorııalar men aýdandyq aýrýhanalardyń bólimsheleri jóndeýden ótti. 2025 jyly Samar aýdandyq aýrýhanasy, Tarbaǵataı aýdanynyń Tuǵyl aýylyndaǵy aýrýhana men dárigerlik ambýlatorııa, Ulan aýdanynyń Asýbulaq jáne Prıvolnoe aýyldaryndaǵy ambýlatorııalar, Kúrshim aýdandyq aýrýhanasy jáne Zaısan aýdanynyń ınfeksııalyq bólimshesinde kúrdeli jóndeý júrgizý josparlanyp otyr.
Jobanyń basym baǵyttarynyń biri – áıelder men balalar úshin medısınalyq qyzmetterdiń qoljetimdiligin arttyrý. 2024 jyly birneshe aýdandyq aýrýhana medısınalyq kómektiń ekinshi deńgeıine aýystyryldy. Bul júkti áıelder men balalarǵa iri qalalarǵa barmaı-aq, jergilikti jerde bilikti medısınalyq kómek alýǵa múmkindik beredi.
Basqarma basshylyǵynyń málimetinshe, mobıldi medısınalyq keshender de belsendi jumys istep tur. Olar shalǵaı aýyldarda dıagnostıkalyq jáne aldyn alý qyzmetterin kórsetedi. 2024 jyly mundaı keshender 54 myńnan astam adamdy qamtydy. Onyń ishinde 4 myńǵa jýyq bala tekserýden ótti. Barlyǵy 44 myńnan astam dıagnostıkalyq zertteý men 57 myń zerthanalyq taldaý júrgizildi. Bul keshender buryn medısınalyq tekserýlerden ótýge múmkindigi bolmaǵan turǵyndar úshin naǵyz qoldaý bolyp otyr.
Skrınıngtik zertteýler aýrýlardyń aldyn alýda mańyzdy ról atqarady. 2024 jyly 156 myńnan astam adam tekserýden ótip, olardyń 3 951-inen aýrýdyń bastapqy belgileri anyqtaldy. Mundaı zertteýler aýrýlardy erte kezeńde anyqtaýǵa múmkindik beredi, bul emdeý tıimdiligin arttyryp, aýyr dertterdiń aldyn alýǵa septigin tıgizedi.
Sonymen qatar, aýyldyq jerlerde medısına kadrlarynyń tapshylyǵyn sheshý de mańyzdy másele bolyp otyr. 2024 jyly ShQO-nyń aýyldyq aımaqtaryna asa tapshy mamandyqtar boıynsha 15 dáriger tartyldy. Sondaı-aq medısına qyzmetkerlerine áleýmettik jeńildikter qarastyrylǵan. Jas dárigerlerge turǵyn úı satyp alý úshin jeńildetilgen nesıe, kóterme járdemaqy jáne birjolǵy tólemder beriledi. Bul sharalar bilikti mamandardy tartýǵa jáne olardy aýyldyq jerlerde ustap qalýǵa kómektesedi.
