Jarystyń ashylý saltanatynda Eńbekshiqazaq aýdanynyń ákimi Talǵat Baıedilov, dzıýdodan elimizdiń eńbek sińirgen jattyqtyrýshysy Tólegen Sultanov, Eńbekshiqazaq aýdany ákiminiń keńesshisi, Almaty oblystyq sambo federasııasynyń vıse-prezıdenti Baqytbek Saqalov, «Esik» memlekettik tarıhı-mádenı mýzeı-qoryǵynyń dırektory Gúlmıra Muhtarova, sport ardageri, Eńbekshiqazaq aýdanynyń Qurmetti azamaty Amanbek Samatov, Eńbekshiqazaq aýdandyq №1 balalar men jasóspirimder sport mektebiniń dırektory Abaı Syrǵabaev sóz sóılep, jarysqa qatysýshylarǵa sáttilik tiledi.
Básekege 500 jas balýannyń qatysýy elimizde dzıýdo sportyna degen qyzyǵýshylyqtyń artyp kele jatqanyn ańǵartady. Almaty oblysynyń sport mamandary jasóspirimder arasyndaǵy jarystardyń jıi, sapaly ótýine erekshe mán berip keledi.
«Týrnırdiń negizgi maqsaty – jas balýandarǵa úlken jarystarǵa jol ashý. Kez kelgen sportshy halyqaralyq saıystarda el mereıin ústem etsem dep armandaıdy. «Altyn adam» týrnıri aldaǵy ýaqytta qanatyn keńge jaıyp, bolashaq chempıondardyń shyǵýyna óz úlesin qosatynyna senimdimin», dedi Eńbekshiqazaq aýdandyq balalar men jasóspirimder sport mektebiniń aǵa jattyqtyrýshysy Serik Maǵjan.
Tórt kúnge sozylǵan saıys qorytyndysynda Almaty oblysynyń sportshylary 8 altyn, 9 kúmis, 12 qola medal ıelenip, birinshi oryn aldy. Almaty qalasynyń sportshylary 6 altyn, 5 kúmis, 13 qola medaldy oljalap, ekinshi orynnan kórindi. Sonyń ishinde Almaty oblysynan chempıon atanǵan ul-qyzdar – Beıbarys Erjanuly, Abdýsalam Orazalıev, Aıtmurat Aldııar, Arystanbek Dıas, Laýra Voropaeva, Alýa Baltabaı, Zere Talǵatqyzy, Aısha Seriktiń beldesýleri óte tartysty ótti.
Almaty oblysy
