Tarıhshy muǵalimder bas qosty

«Áıgili tarıhshynyń mereı­­­toıyna oraı­las­ty­ryl­ǵan bul fo­rým­nyń maq­sa­ty – eli­miz­diń mektep­te­rin­de tarıh pá­nin oqy­týdyń ózekti másele­le­rin talqylaý, tarıh páni muǵa­limderiniń biryńǵaı qaýym­dastyǵyn qurý edi» deıdi osy is-sharany uıym­dastyrýshylardyń biri, Batys Qazaqstan oblys­tyq bilim basqarmasy ádis­te­melik ortalyǵy tarıh pá­­niniń ádiskeri Dınara Jeksenǵalıqyzy. Jıyn sońy­nan aıtylyp jatqan lebiz-pikirlerge qaraǵanda, bul maqsat oryndalǵan sııaqty.

– Men Astana qalasynan kel­dim. Keńes kezinde alǵashqy ǵyly­mı jumysymdy Ermuhan Bek­mahanulynyń ómiri men shy­ǵarmashylyǵyna arna­ǵanym úshin kedergi, qysastyq kórgenim esimde. Kór­nekti tarıhshynyń Oral peda­go­gı­kalyq ýnıversı­tetinde dáris oqyǵanyn estip jatyrmyn. Jalpy, osy forýmda Batys Qazaqstannyń baı tarıhyna kýá boldyq, kóp derekti estip-bilip, tájirıbe aldyq, – deıdi Astana qalasy ádistemelik ortalyǵynyń tarıh pániniń ádiskeri Janar Tóleýǵasymqyzy.

Forýmǵa Astanadan bólek, Aqtóbe, Atyraý, Qyzylorda, Mań­ǵystaý oblystarynan, Batys Qazaqstan oblystarynyń bar­lyq aýdanynan tarıh páni muǵalimderi men ádiskerler qatysty. Alty bólimnen turǵan forýmnyń alǵashqy bóliginde oraldyq ǵa­lymdar, tarıh ǵy­lym­darynyń kandıdaty Baq­ty­ly Boranbaeva men arheolog Iаna Luqpanova dáris oqyp, otandyq tarıhtyń tyń derekteri men ǵylymı jańalyqtarymen bólisti. «Bootcamp» atty bólimde tájirıbeli muǵalimder ózderi­niń ınnovasııalyq ádisteri men oqytý tájirıbe­lerin orta­ǵa saldy. Pedagogter ja­ńar­tylǵan bilim berý maz­muny aıasynda tarıh pánin oqytýdyń zamanaýı ádisterin talqylady. Al «Creative Gallery» ádistemelik kórmesine Oral qalasy, Bór­li, Qaratóbe, Shyńǵyrlaý aýdan­da­rynan kelgen tarıh páni muǵa­limderi ózderiniń avtor­lyq laıfhaktaryn, tıimdi ádis­temelik qural­daryn qoıyp, forým qaty­sý­shylaryna tanys­tyrdy. Sıfr­lyq ıntellekt karta­lar arqyly ólke tarıhyn vızýal­dy zertteý, tarıhı fotosýretter men kórnekilikterdi paıdalaný, kartografııalyq ónimderdi tarıh sabaǵynda qoldaný sekildi naqty keńester ár muǵalimge paıdaly bolǵany anyq. «Workshop&Pitching» atty ádistemelik alańda us­taz­­dar­dyń sheberlik saǵa­ty uıym­das­tyrylyp, oqy­tý­daǵy qundy­lyqtar, fýnk­sıo­nal­dyq saýatty­lyqty damytý joldary jáne jasandy ıntellektiniń tarıh sabaǵynda qoldanylý múmkindigi tal­qy­landy. Muǵalimder ózde­riniń úzdik tájirıbelerin usy­nyp, pikir almasty. Munda tarıh pánin oqytýdaǵy ulttyq qundylyqtyń mańyzyna basa mán berildi.

Jıynnyń ekinshi kúni forým qonaqtary óńirdegi ólketaný jáne zertteý baǵyt­ta­rymen ta­nys­ty. «Tarikh Talks» alańyn­da batys­qazaqstandyq ólketaný­shylar Aıbolat Qurymbaev pen Ahmedııar Batyrhanov sóz alyp, ınternet saıttaryn tarıhı-ólketaný jumystarynda paıdalaný múmkindikteri týraly, Ekinshi dúnıejúzilik soǵystaǵy soǵys tutqyndarynyń deregin Reseı Qorǵanys mınıstrliginiń ınternet resýrstarynan izdeý jóninde tájirıbelerimen bó­listi. Forým komandalyq tarı­hı «Quiz» oıynymen qorytyn­dylandy. Bul saıys muǵa­lim­derdiń tanymdyq qabiletin shyń­dap, tarıhty oqytýda oıyn ádisterin qoldanýdyń tıimdiligin kórsetti.

Tarıhı kýızdiń qory­tyn­dysy boıynsha Qyzylorda, Atyraý jáne Batys Qazaqstan oblysta­rynyń pedagogterinen quralǵan top jeńimpaz atandy. Búkil qatysýshylarǵa sertıfıkat pen Alǵyshat tabys etildi.

Batys Qazaqstan oblysy