«Ulttyq bala asyrap alý» agenttiginiń basshysy Farıda Rahmetova: «Qazirgi tańda elimizde asyrap alý, qamqorshylyǵyna alý, patronattyq otbasy bolý syndy dástúrli otbasyna qabyldaýdyń birneshe formasy bar. 2025 jyldan kásibı qabyldaýshy otbasy engizildi. Mundaı otbasylar tolyq bolýy kerek. Bir otbasyna 4 baladan artyq ornalastyrýǵa bolmaıdy. Kásibı qabyldaýshy otbasyn anyqtaý men jumys júrgizý, irikteý jergilikti atqarýshy organnyń mindetine kiredi. Kásibı qabyldaýshy otbasyna qabyldaýdyń ózi birneshe túrge bólinedi. Iаǵnı aıaq astynan bala ata-anasynyń qamqorlyǵynsyz qalǵanda ýaqytsha nemese alty aıǵa ornalastyrylady. Úshinshisi – bala 18 jasqa tolǵansha uzaq merzimge deıin qaldyrýdy qarastyrady», deıdi.
Almatyda bala asyrap alýǵa kásibı turǵyda daǵdylanǵan otbasylyq júıe júzege asyrylyp jatqandyqtan, áke-sheshesiz qalǵan balalardy qoldaýǵa baǵyttalǵan bastamalar durys baǵyt ala bastady. Osy oraıda «Ulttyq bala asyrap alý agenttigi» jobasynyń jetekshisi F.Rahmetova Kásibı qabyldaýshy otbasy ınstıtýtyn engizýge qatysty jańa zań jobasynyń mańyzdylyǵy týraly aıta kele: «Ulttyq asyrap alý agenttigi – elimizde bala asyrap alý mádenıetin damytý men kásibı qabyldaýshy otbasylardy qoldaýda segiz jyldan beri eńbek etip kele jatqan «Ana úıi» qorynyń mańyzdy bóligi», – dedi.
Qazirde elimizde 20 keńes berý kabıneti qyzmet atqarady, onda qor mamandary jetim balalardy otbasyna qabyldaǵysy keletin azamattarǵa kómek kórsetedi. Tek Almatynyń ózinde joba iske qosylǵaly beri 2285 adam mamandardan keńes alyp, 818 azamat Kásibı qabyldaýshy otbasy mektebinde daıyndyqtan ótken. Endigi jerde osy baǵdarlamanyń arqasynda almatylyq 105 otbasy 158 jetim balany qamqorlyǵyna alyp otyr.
«Keıingi 12 jyl ishinde ınternattyq mekemelerdegi balalar sany 10 myńnan 4 myńǵa deıin qysqardy. Alaıda, ótken bes jylda bul kórsetkish ózgergen joq. Buǵan basty sebep – jetim qalǵan balalardyń kóbi jasóspirimder, erekshe kútimdi qajet etetin nemese baýyrlary bar balalar. Mundaı balalardy dástúrli asyrap alýshy otbasylarǵa ornalastyrý qıynyraq», deıdi «Ana úıi» qorynyń psıhologııalyq qyzmetiniń jetekshisi Laýra Aqataeva.
Osy oraıda elimizde Balany qabyldaıtyn otbasy týraly Ereje bekitilip, Kásibı qabyldaýshy otbasy ınstıtýtyn engizetin zań jobasy ázirlendi. 2025 jyldyń basynda ony Prezıdent Qasym-Jomart Toqaev maquldap, qujat «Neke jáne otbasy týraly» Kodekske resmı túrde endi.
Endigi jerde jańa júıe aıasynda ózgeniń balasyna óz perzentindeı ósirýge jaýapkershilik arqalaǵan ata-analar arnaıy daıyndyqtan ótip, kásibı turǵyda qamqorlyq tanytady degen boljam bar. Olarǵa memleket tarapynan qarjylyq qoldaý kórsetiledi, árbir ata-anaǵa 70 AEK, balany asyraýǵa 10 AEK kóleminde kómek beriledi. Sondaı-aq mundaı otbasylarǵa mindetti qoldaý, onyń ishinde quqyqtyq, áleýmettik, psıhologııalyq kómekter kórsetilmek.
«Asyrap alýshy ata-analar qatań irikteýden ótedi, olardyń nıeti men daıyndyq deńgeıin anyqtaıtyn dıagnostıkalyq suhbat júrgiziledi. Sonymen qatar olar Asyrap alýshy ata-analar mektebinde oqytylyp, bala otbasyna qabyldanǵannan keıin turaqty túrde mamandardyń qoldaýyna ıe bolady», dedi F.Rahmetova.
ALMATY
