Jambyl oblysynda bolǵan ushaq apatynyń sebebi anyqtaldy

QARAǴANDY. 19 maýsym. Osy jyldyń qańtar aıynda jerge qulaǵan AN-2 ushaǵynyń apatyn tekserý komıssııasy oqıǵanyń neden bolǵan sebebin anyqtady. Komıssııa qorytyndysyna sensek, apat – ushaq ekıpajynyń aýa raıynyń qolaısyz jaǵdaıynda bıiktik qaýipsizdigin saqtamaýynan bolǵan eken. Bul týraly Investısııalar jáne damý jónindegi mınıstrliktiń baspasóz qyzmeti habarlady. «AN-2 ekıpajynyń jerdegi baǵdarmen baılanyspaı bıiktikti tómendetý týraly negizsiz sheshimi áýe kemesiniń jermen soqtyǵysýyna ákep soqqan», – delingen atalǵan mınıstrliktiń habarlamasynda. Bekitilgen qorytyndy esep aldyn-ala tergeý amaldaryn júrgizgen Ishki ister mınıstrligi men Bas kólik prokýratýrasyna jiberiledi. Eske salsaq, bıylǵy jyldyń 20 qańtarynda Jambyl oblysyndaǵy «Shatyrkól» kenishiniń mańynda qalyń tumanda jerge qonbaq bolǵan AN-2 ushaǵy apatqa ushyraǵan bolatyn. Ushaqtyń bortynda 7 adam bolǵan, onyń úsheýi ekıpaj músheleri. Apattan ekıpaj músheleriniń barlyǵy jáne de 3 jolaýshy qaıtys boldy. Bulardyń bári de «Qazaqmys» korporasııasynyń qyzmetkerleri-tuǵyn. Al kompanııanyń taǵy bir qyzmetkeri Ásem Shaıahmetova qudaı saqtap, sol apattan aman qalǵan bolatyn. Qazirgi ýaqytta ol Astanada emdelip jatyr. Apatqa ushyraǵan ushaq 1973 jyly jasalyp shyqqan, «Olımp Eır» JShS-niń menshigi (tapsyrys berýshi – «Balqashtúsmet» О́B, «Qazaqmys» JShS Korporasııasy). 2002 jyly bul áýe kemesi Aqtóbeniń avıajóndeý zaýytynda kúrdeli jóndeýden ótken eken. 2007 jyly ony «Qazaqmys» kompanııasy satyp alypty. Qaırat Ábildınov. Derek: Investısııalar jáne damý jónindegi mınıstrliktiń baspasóz qyzmeti. Sýret: tengrinews.kz.