Soltústik Qazaqstanda qaıyńdy alqap otalyp jatyr

PETROPAVL. 19 maýsym. Qyzyljar óńiriniń turǵyndary terek-qaıyńy aralas qalyń aǵashtyń otalýy jaıly   tıisti oryndarǵa san márte dabyldatqanymen, naqty shara qoldanylmaı otyr.  Bul týraly KTK telearnasy habarlady. Al, jańǵyrtý úshin jasyl alqapty jalǵa alǵan kompanııa 3 jyl boıy aǵash kesýmen aınalysyp, birde-bir óskin otyrǵyzbaǵan kórinedi. «Jyl ótken saıyn Aıyrtaýdyń jelegi jaıqalǵan áıgili qaıyńdy ormany sırep barady. Aýyl mańynyń da sıqy qashyp, berekesi kettti.  Aǵash ońdy-soldy otalyp, jumyrtqadan jún qyryqqan paıdakúnemder qaltalaryn qalyńdatýda», deıdi aıyrtaýlyqtar. Karasevka aýylynyń turǵyny Ǵazez Esmaǵulovtyń pikirinshe, kesilgen aǵash ornyna kóshet otyrǵyzyp jatqan eshkim joq. Jergilikti bılikke shaǵymdanǵanmen, olardan qaıyr bolmaı tur. Soǵan qaraǵanda aǵashty zańsyz kesý buıryǵy joǵary jaqtan kelgen sekildi. Qystaı tonaǵandary azdaı jazda da bilek sybana kirisipti.  Kesilgen júzdegen túbirlerge qaraǵanda, qulashty alysqa silteıtin túrleri bar. Jaqyn arada toqtaıtyn túrleri kórinbeıdi. Ormanshylar bolsa, kesilgender tek aýrý-syrqaý, shirigenderi dep jaıbaraqat qarap otyr. «Jumys zań júzinde atqarylyp jatyr. Qýraǵan aǵashtar ǵana otalady», deıdi ormanshy Saǵat Jazbaev. Jasyl jelekti jańǵyrtý ormandy alqapty 10 jylǵa jalǵa alǵan «Ýglejog» seriktestiginiń óńi túgil túsine de kirip shyqpaıtyn tárizdi.  Ormanshylardan kúder úzgen jurt endi seriktestikpen sottaspaqshy. О́mir Esqalı. Derek: KTK telearnasy. Sýret: egemen.kz