«Merdiger kompanııa «Dáýlet-Serpin» JShS qurylys jumysyn tolyǵymen aıaqtady. Kúrdeli jóndeý kezinde ınjenerlik jelileri, shatyry, qazandyǵy, esik-terezeleri túgeldeı aýystyrylyp, ambýlatorııanyń aýlasy abattandyryldy. Sondaı-aq elimizde sırek kezdesetin teńdessiz zerthana da osy jerde ashylady. Zamanaýı qurylǵy qysqa ýaqyt ishinde taldaýlardyń nátıjesin shyǵaryp, naýqastarǵa der kezinde kómek kórsetýge múmkindik beredi. Buǵan qosa, munda rentgen apparaty iske qosylady. Kúrdeli jóndeýge deıin bir ǵana korpýs jumys istese, endi eki korpýs qosylyp, jumys aıasy keńidi, halyqqa qyzmet kórsetý sapasy aıtarlyqtaı artty», deıdi Qonaev qalalyq kópsalaly aýrýhananyń dırektory Aıman Raqysheva.
Nysan bir aýysymda 100 adamdy qabyldaı alady, kúndizgi em alý bólimi 10 adamǵa arnalǵan. Munda jalpy praktıka dárigerleri, pedıatr, balalar tis dárigeri, meıirbıkeler men kishi meıirbıkeler qyzmet etedi. Barlyǵy 18 maman, kadr tapshylyǵy joq.
Analar men balalardy qabyldaýǵa da jaǵdaı jasalǵan. Dáriger-gınekologter Qonaev qalasynan kelip, kestege saı qyzmet kórsetedi. Kabıneti zamanaýı jabdyqtarmen qamtamasyz etilgen, barlyq qajetti quraldar bar. Shuǵyl jaǵdaı bolsa, naýqastar birden Qonaev qalasyna jóneltiledi.
«Aýyl turǵyndary túgelge jýyq júginetin medısınalyq nysannyń kúrdeli jóndeýden ótkenine qatty qýandyq. Mekemeniń talapqa saı bolýy aýyryp kelgen jannyń eńsesin tiktep, kóńilin serpiltýge de sebin tıgizeri sózsiz. Apta saıyn baqylaýdan ótetin júkti áıelderge de yńǵaıly, qolaıly. Aýylymyzdaǵy áleýmettiń áleýetin jaqsartýǵa baǵyttalǵan jumystardy der kezinde aıaqtap bergeni úshin qurylysshy mamandarǵa alǵystan basqa aıtarymyz joq», deıdi jergilikti turǵyn Nazgúl Ergenqyzy.
Búginde Sheńgeldi aýylyna qarasty Qosqudyq eldi mekeninde feldsherlik-akýsherlik pýnkt, Sarybulaq pen Aqózekte medpýnkt aýyl turǵyndaryna turaqty, sapaly medısınalyq qyzmet kórsetedi.
Almaty oblysy
