Búgin Premer-mınıstr Oljas Bektenov qytaılyq China CAMC Engineering Co., Ltd. (CAMCE) kompanııasynyń prezıdenti Lı Haısınmen kezdesý ótkizdi.
China CAMC Engineering Co., Ltd. – 60-tan astam elde ınfraqurylymdy, ónerkásipti jáne energetıkany damytý salalarynda keshendi EPC-jobalardy iske asyratyn jáne Qytaıdyń Sinomach Group (China National Machinery Industry Corporation) mashına jasaý jónindegi iri memlekettik konglomeratynyń quramyna kiretin jetekshi halyqaralyq ınjınırıngtik kompanııa.
Kompanııa prezıdenti Lı Haısın Alataý qalasynyń kólik-logıstıkalyq jáne ındýstrııalyq ınfraqurylymyn damytý salasyndaǵy ınvestısııalyq yntymaqtastyqtyń perspektıvalary týraly birqatar usynys aıtty. «Orta dálizdi» damytý aıasyndaǵy yntymaqtastyqqa nazar aýdaryldy.
«Úkimet jumysynyń basym baǵyttarynyń biri – barynsha qolaıly ınvestısııalyq ahýal qalyptastyrý. Bul naqty ekonomıkaǵa tikeleı sheteldik ınvestısııalardy tartýǵa jáne elimiz úshin mańyzdy jobalardy iske asyrýdy qamtamasyz etýge, jańa jumys oryndaryn ashýǵa múmkindik beredi. Keıingi alty jylda elimizge tartylǵan tikeleı sheteldik ınvestısııalar kólemi shamamen 130 mlrd dollardy qurady. Bul rette Memleket basshysynyń shıkizattyq emes salalardyń tartymdylyǵyn arttyrý boıynsha bastamashylyq jasaǵan sharalary nátıje berýde – shıkizattyq emes sektorǵa sheteldik ınvestısııalar 72,7 mlrd dollardy qurady, ıaǵnı sheteldik áriptester qaıta óńdeý ónerkásibi salalaryna kóbirek ınvestısııa sala bastady», dedi O.Bektenov.
Kezdesý qorytyndysy boıynsha tıisti memlekettik organdarǵa ınvestısııalyq usynysty egjeı-tegjeıli pysyqtaý tapsyryldy.
