Asqaq armany qııalarǵa alyp ushatyn Jannurdy aýyldastary «ulǵa bergisiz qyz» dep ketken. Kishkentaı kezinen malsaq bolyp ósken boıjetkenge úıdiń tirshiliginen góri jazda mal jaıyp, qysta qora-jaıdyń sharýasyn tyndyryp tastaý tez. Taý qyzynyń atqa áýestigi erte jastan qalyptasqan. Janýardyń jalyn tarap, mańdaıyn sıpap, erekshe sezimge bólenetin Jannur attyń qulaǵynda oınaıdy.
«Qyzym – otbasyndaǵy tórt balanyń ekinshisi. Baýyrlaryna qamqor, qımyly shıraq, ózi ójet bolyp ósti. Uldarmen tez til tabysady. Olarmen asyq oınap ketetin kezderi boldy. Tabıǵat aıasyna shyqqandy, atqa mingendi óte jaqsy kóredi. Qazir mektep bitiretindikten, kún-tún demeı UBT-ǵa daıyndalyp jatyr. Sharshaǵan sátterde atqa minip, bir aınalyp kelse, sergip, qýanyp qalady», deıdi anasy, tarıh pániniń muǵalimi Farıda Úmbetjanova.
Balalardyń úlkeni Nazym Qýatqyzy Tuıyq aýylyndaǵy orta mektepti «Altyn belgimen», ál-Farabı atyndaǵy Qazaq memlekettik ulttyq ýnıversıtetiniń shyǵystaný fakýltetin qyzyl dıplommen bitirgen. Qazir magıstratýrada bilimin shyńdap jatyr. Jannur bolsa hımııa, bıologııa pánderin tańdap, aldaǵy synaqqa qyzý daıyndyq jasap júr. Keleshekte ana jolyn qýyp, ustaz bolýdy qalaıdy. О́zinen keıingi Aqnur men inisi Nurjandy da jaqsy oqýǵa baýlyp, qamqorlyq tanytyp otyrady.
«Men qazaq qyzdaryna qaıran qalam,
Janary, jany jazdaı jaırańdaǵan.
«Qyz ósse – eldiń kórki» degen sózdi,
Qapysyz qalaı aıtqan qaıran babam?»,
degen jyr joldary Jannurdaı jany izgi, janaryna meıirim tunǵan, erik-jigeri asqaq arýlarǵa arnalsa kerek.
Almaty oblysy,
Kegen aýdany
