«Ermegim osy boldy. Túnde uıqym qashsa kitap oqyp, tań atyramyn. Baıaǵyda ǵoı, beınetpen júrip, bel jazýǵa ýaqyt tappaıtyn edik. Endi qudaı qaıtarymyn berip jatyr», dep ázilmen áńgime tıegin aǵytatyn Ultýar apanyń ómir joly bir kitapqa júk bolary anyq.
16 jasqa tolǵanda ata-anasy aq batasyn berip, qutty ornyna qondyrǵan. Qol ustasqan qosaǵy Jolseıit Moldasanov ekeýi aldyna bir otar qoı salyp, erte jastan eńbekke aralasady. Qysy qatal ári alty aıǵa sozylatyn taýly óńir qasıetti Qarqara aýlynyń tarıhy tereńde jatqan Qumtekeı qystaýyn qystap, mal shyǵynyna jol bermeýge kúsh salady. Kóktemgi tólde qoı qozdatyp, júz saýlyqtan júz jıyrma, júz elýge deıin qozy órgizip, aýdandaǵy ozat shopandardyń kóshin bastaıdy. Eseli eńbegi janǵan Jolseıit Moldasanov Eńbek Eri atanady. Keýdesine Altyn Juldyz ordenin jarqyrata taǵady. Basyna baq qondyrǵan qutty mekendi urpaǵy umytpasyn degen nıetpen Jolseıit ata keıin nemeresine Qumtekeı dep at qoıdy. Eńbek Eriniń kenje uly Qanat Moldasanov áke jolyn qýyp, mal ósirýdi ózine murat tutty.
«Otpen kirip, kúlmen shyǵyp, jumys istedik. Myńǵyrǵan malmen oı men qyrda júrdik. Jolseıit atańnyń aǵasy soǵystan qaıtpaı qaldy. Jalǵyz ulynyń tileýin tilegen enemniń kóp kómegin, meıirimin kórdim, aq batasyn aldym. «Bataly qul arymas, batasyz qul jarymas» dep beker aıtpaǵan ǵoı. Eńbegimiz aqtalyp, úlken marapatqa bólendik. Alys-jaqyn sheteldi kórdik. Sonyń bári ózdiginen kelgen joq, shúmektegen mańdaı terdiń óteýi», dep tolǵanatyn Ultýar apa on balany ómirge ákep, ósirgen. Sóıtip, altyn qursaq ananyń arqasynda bir áýlettiń jalǵyz tuıaǵy Jolseıit atanyń japyraǵy jaıylyp, úlken báıterekke aınalady. Búginde on baladan 30-ǵa jýyq nemere súıip, 10 shaqty shóbereniń alaqanynan maı jalap otyrǵan baqytty áje.
«Áıel – tirshiliktiń tiregi. Otyn jaǵyp, qazanyn qaınatyp otyrǵan analardyń arqasynda úı shýaqqa bólenip, berekesi kiredi. Kelinderiminiń kese-kóldeneń ótkenin kórgenim joq. «Tek» degen uǵymnyń tórkinin túsinetin, úlken-kishini qurmetteıtin kórgendi jandar. Bárin úırenip, meńgerip ósti. Qazir zaman basqa dese de, áıeldiń otbasy aldyndaǵy mindeti ózgergen joq, shyraǵym», – degen Ultýar apanyń áńgimesi ulttyq tárbıemen ushtasty.
«Balany ata-ana jaman bolsyn demeıdi, biraq uıada kórgenin boıyna sińiredi. Ul-qyz ósirip otyrǵan soń olarǵa nan ılep, et asýdy, keste tikpese de úı jınaýdy, tipti obal-saýapty sanasyna sińirse, onyń rahatyn ózderi kóredi. Eńbekpen eseıgen balanyń ómirge beıim keledi», degen danalyǵyn bólisti.
О́mirdiń ystyq-sýyǵyn kórip, ǵasyr jasyna jýyqtaǵan Ultýar apanyń áserli áńgimesin tyńdaı bergiń keledi. Ásirese ulttyq taǵam túrlerin daıyndaýdaǵy sheberligin kelinderi jetik meńgergendigine qýanady. Irimshik qaınatyp, qurt-maı alý, babyna keltire qymyz ashytý, jaýbúırek, shujyq jasaý, naýryz kóje daıyndaý, tizbeleı bersek, maldyń et-sútin kádege jaratyp, tabıǵı azyq-túliktiń mol qoryn jasaý – asyl ájelerdiń aınymas dástúri bolǵanyn jıi eske salyp otyrady.
Almaty oblysy
