Venera – «KEGOC» Ortalyq júıearalyq elektr toraby fılıalyna qarasty «Jezqazǵan» qosalqy stansasynyń 6-razrıadty elektrmonteri. О́z isiniń has sheberine aınalǵansha qyzyǵy men qıyndyǵy qatar júrgen tirshilik tepkishekterin basyp ótti. Astanaǵa taıaý Arshaly aýdanynda kópbalaly otbasynda týyp-ósken. Mektepten soń medısına salasyn tańdaǵan. Oǵan aıaýly anasy men týǵan-týystary qatty qýandy. Sebebi ákesi qyryqtan endi asa bergende kóz jumyp, jesir qalǵan anasy 9 balany ósirip, jetildirip kele jatyr edi.
О́mirlik jary Ahatpen Qaraǵandy medısına ınstıtýtynda oqyp júrip tanysty. Biraq otbasylyq jaǵdaıǵa baılanysty oqý ornyn tolyq aıaqtamaı, basqa mamandyqqa aýysyp ketti. 1997 jyly Jezqazǵan polıtehnıkalyq ýnıversıtetin «Ekonomıka jáne kásiporyndy basqarý» mamandyǵy boıynsha bitirdi. Taý-ken ınjeneri, ekonomıst dárejesin alyp shyqty. Qyzmetin energetıka salasyna aýystyrǵanda bilimin tolyqtyrýdy oılady. 2009 jyly Qazaq kólik ýnıversıtetin «Elektrmen jabdyqtaý» mamandyǵy boıynsha támamdady.
Veneranyń baýyrlary onyń óte qamqor, qaıyrymdy jan ekenin aıtady. Al áriptesteri kásibıligi men talapshyldyǵy týraly áńgimeleıdi. Búginde otaǵasy ekeýi berekeli otbasynyń uıytqysy bolyp otyr. Botakóz esimdi qyzy Astanadaǵy Qytaı kompanııasynda qyzmet istese, uly Asqar «Qazaqmys» korporasııasynda eńbek etedi.
«Shýaqty kóktemniń shyraıy – gúl men áıel ǵoı. 8 naýryz – áıelderdiń halyqaralyq merekesinde aıaýly anam Rymtaı Kenjebekqyzyn eske alamyn. Jap-jas kezinde kúıeýi bizdiń ákemiz Rahymtaı Kárbozulynan aıyrylyp, 9 balany jalǵyz júrip jetildirdi. О́mirdiń dańǵyl jolyna saldy. Oqytty, toqytty, jan balasynan kem qylǵan joq. Sonyń arqasynda súıikti isimizben aınalysyp, el ekonomıkasyna tıtimdeı bolsa da úlesimizdi qosyp otyrmyz. Barsha arýlardy aıtýly meırammen quttyqtaımyn», deıdi Venera.
