Analary alańsyz qoǵamda balalar da baqytty ómir súredi

– «Áıel bir qolymen besikti terbetse, bir qolymen álemdi terbetedi» degen sóz beker aıtylmaǵan. Áıel – shańyraqtyń shyraǵy, ulttyń uıytqysy. Ana – tirshilik pen berekeniń bastaýy, adamzat boıyndaǵy bar izgiliktiń qaınar kózi. Ananyń aıaly alaqany men sheksiz meıirimi ár úıge jylylyq beredi. Salt-dástúrimiz ben ana tilimizdiń búgingi kúnge jetýi de, eń aldymen, analardyń arqasy. О́mirdiń máni de, tirshiliktiń sáni de – sizder! Sondyqtan búgingi meıramda barsha er-azamattar ózderińizge aq tilegin arnap, yqylas-iltıpatyn bildirip jatyr. Solardyń ishinde men de Memleket basshysy retinde áıelderge tilegimdi, lebizimdi aıtyp turmyn, – dedi Qasym-Jomart Toqaev.

Memleket basshysy halqymyzda erlik pen eldiktiń týyn bıik ustaǵan arýlar az emes ekenin alǵa tartyp, olardyń esimi el shejiresine altyn árippen jazylǵanyn aıtty.

– Tumar men Bopaı hanym­dardyń, Domalaq ana, Zere jáne Ulpan analardyń, Álııa, Mánshúk, Hıýaz sekildi batyr qyzdarymyzdyń aty el jadynda. Sizderdi aqyly men ajary, danalyǵy men daralyǵy kelis­ken qazaq áıeliniń izbasary deý­ge bolady. Áıelder qaýymy kúr­deli kezeńderde aıanbaı eńbek etti, Otanymyzdyń ósip-órkendeýi­ne belsene atsalysty. Urpaq tárbıesi – ult tárbıesi. Búginde sizder sanasy sergek, oıy azat urpaq ósirip, Otanymyzdyń órken jaıýyna aıryqsha úles qosyp kelesizder. Qazaqstan­nyń san túrli salada jetistikke jetýi­ne qyz-kelinshekterimiz mol eńbek sińirýde. Búgin Aqordaǵa shaqyrylǵan áıelder arasynda Otanymyzǵa ár salada eńbek sińirgen bilikti mamandar bar. Men barshańyzǵa zor alǵys aıtamyn! – dedi Prezıdent.

Qasym-Jomart Toqaevtyń pikirinshe, analary alańsyz qoǵamda balalar da baqytty ómir súredi. Bul rette Prezıdent elimizde áıelderdiń quqyǵyn qorǵaý, olardy qoldaý baǵytynda júrgizilip jatqan ıgi isterge aıryqsha toqtaldy.

– Ana men balanyń jaǵ­daıy durys bolsa, áleýmettiń jaǵdaıy da durys bolady. Sondyqtan bolashaǵyn oılaǵan el, eń aldymen, áıelderdiń jaǵdaıyn jaqsartýdy oılaıdy. Memleketimiz áıelderdi barynsha qorǵaýǵa jáne jan-jaqty qoldaýǵa basa mán bere­di. Osy baǵytta naqty jumys­tar atqarylyp jatyr. Meniń tapsyrmammen otbasy ınstıtýtyn nyǵaıtýdy kózdeıtin mańyzdy sharalar qabyldandy. Barlyq aımaqta qıyn jaǵdaıǵa tap bolǵan otbasylarǵa qoldaý kórsetetin ortalyqtar ashylyp jatyr. Kópbalaly analardy qoldaýdyń ulttyq modeli qalyp­tasty. Sonyń arqasynda jyl ótken saıyn kópbalaly ot­basylardyń sany artyp keledi, – dedi Memleket basshysy.

Prezıdent qazir áıelder túrli salada tabysty eńbek etip júrgenin atap ótti.

– Memlekettik qyzmetshiler­diń jartysynan kóbi – áıelder. Bilim berý, densaýlyq saq­taý salasyndaǵy mamandardyń 70 paıyzdan astamy da – áıel­der qaýymy. Sondaı-aq olar tótenshe jaǵdaılar, qorǵanys jáne quqyq qorǵaý organdarynda tabysty jumys istep júr. Kóptegen áıel laýazymdy qyzmetter atqarady, sizderdiń aralaryńyzda da tabysty basshylar az emes. Qyz-kelinshekter bızneste de jetistikke jetip júr. Boılaryńyzdaǵy maqsatkerlik pen jasampazdyq qýaty eń batyl bastamalaryńyzdy júzege asy­rýǵa kómektesip keledi. Berik azamat­tyq ustanym­daryńyzdy tanytyp, qoǵam­dyq ju­mysqa da jan-jaqty atsalysa­syz­­dar. Mańyzdy bastamalar men ha­lyqqa qajetti áleýmettik jobalardy iske asyryp júrsizder. Qaı ispen aına­lyssańyzdar da jaýapkershilikpen qarap, udaıy oń nátıjege qol jetkizip kelesizder. Álemdik dodalarda top jaryp, elimizdiń abyroıyn asqaq­tatyp júrgen arýlarymyz da bar. Biz qajyrly eńbegimen, eren erligimen tanylǵan qyz-ke­lin­­­shekterdi maqtan tuta­myz. Táýel­­siz­­dik jyldary óz sala­sy­nyń úz­digi atanǵan 8 áıelge «Qazaq­­­stan­­nyń Eńbek Eri» ataǵy be­ril­­di, – dedi Memleket basshysy.

Osy oraıda Prezıdent bıyl elimizde «Jumysshy maman­dyqtary jyly» dep jarııalanyp, bilikti mamandardyń mártebesin kóterý úshin belsendi jumys júrgizilip jatqanyna nazar aýdardy.

– Mysaly, memlekettik marapattar júıesine jańadan toǵyz qurmetti ataq engizildi. Búgin osyndaı eki marapat alǵash ret tapsyrylady. «Qazaqstannyń eńbek sińirgen qurylysshysy» ataǵy eńbek ardageri Olga Shelýd­koǵa beriledi. Al óndiris ozaty Maıra Ermanova «Qazaq­stannyń eńbek sińirgen óner­kásip qaıratkeri» atanyp otyr. Osyndaı naǵyz eńbek adamdary­na búkil el bolyp qurmet kór­se­tip, olardy jan-jaqty dáripteýi­miz kerek. Jumysshy mamandyqtary jylynyń túpki máni de – osy, – dedi Qasym-Jomart Toqaev.

Saltanatty jıynda Mem­leket basshysy elimizdiń damýyna eleýli eńbek sińirgen, óz salasynda joǵary jetistikke jetken bir top áıel azamatqa memlekettik nagradalar tabystady.

Jalpy, ataýly merekede Prezı­dent Jarlyǵymen mem­leket­tik nagradalarmen marapat­talǵandardyń qatarynda: 4 eńbek ardageri; 19 jumysshy maman men kásiporyn eńbekkerleri; 14 densaýlyq saqtaý, bilim berý, ǵylym jáne mádenıet salasynyń qyzmetkerleri; 6 kásiporyn basshysy; 3 qoǵamdyq uıym ókili; 7 memlekettik qyzmetker; 6 quqyq qorǵaý, arnaýly jáne baqylaýshy organdarda, ásker qatarynda eńbek etetin qyzmetkerler bar.

Sondaı-aq osy kúni Prezı­dent  «Áıel – sulýlyqtyń áýeni» atty merekelik konsertti tama­­shalady. «Astana Opera» teatryn­da ótken saltanatty keshte eli­mizge tanymal máde­nıet qaı­rat­kerleri, estrada jul­dyz­dary men túrli shyǵar­mashylyq ujymdary óner kórsetti.