Rıýaıattarǵa súıensek, Adam ata men Haýa ana jaratylys bastalǵan kezde peıishte ómir súrgen. Alla olarǵa jumaqtaǵy bıdaıdy jeýge tyıym salǵan. Alaıda shaıtannyń azǵyrýymen olar sol tyıym salynǵan bıdaıdy jep qoıǵan. Osy áreketi úshin Táńiri olardy jerge túsirip, táýbege kelý úshin oraza ustaýdy buıyrǵan.
Ańyz boıynsha, tyıym salynǵan bıdaıdyń qaldyǵy Adam ata men Haýa ananyń asqazanynda qorytylmaı qalyp qoıǵan. Táńirdiń buıryǵymen olar otyz kún oraza ustap, denesin aram astan tazartqan eken. Osylaısha, otyz kún oraza dástúri sol kezden beri jalǵasyp keledi degen senim bar.
Islam dininde orazanyń paryz etilýi Quran Kárimniń «Baqara» súresinde bekitilgeni belgili. Biraq, Adam ata men Haýa anaǵa qatysty bul oqıǵa halyqtyq nanym retinde ıslam mádenıetinde erekshe oryn alady.
Bul ańyz otyz kún orazanyń tek qulshylyq emes, adamnyń jan-dúnıesin jáne denesin tazartýdyń rýhanı joly ekenin aıqyn kórsetedi.
