Foto: senate.parlam.kz
Depýtattyń pikirinshe, Quryltaıda Qazaqstan damýynyń negizgi baǵyttary, sonyń ishinde ekonomıkany reformalaý, áleýmettik saıasat, zań men tártipti nyǵaıtý, ıdeologııalyq jumystardy júıeleý máseleleri talqylandy. Prezıdent óziniń baǵdarlamalyq baıandamasynda qazirgi jaǵdaıǵa jan-jaqty taldaý jasap, kóptegen máseleler boıynsha júıeli sheshimder usynyp, bolashaqqa arnalǵan mindetterdi belgiledi.
«Ideologııa – qoǵamnyń qundylyǵyn, saıası jáne mádenı baǵdarlaryn qalyptastyratyn negizgi faktorlardyń biri. Qazirgi jahandaný dáýirinde onyń róli kúsheıgeni sózsiz.
Memleket basshysy ıdeologııalyq jáne gýmanıtarlyq jobalardyń mańyzdylyǵyna toqtalyp, Ishki saıasat tujyrymdamasyn ázirleý jáne Úkimettik emes uıymdar týraly zańnamany jetildirýdi tapsyrdy», dep jazdy B.Jeksenbaı.
Senatordyń sózinshe, jahandaný men tehnologııalyq úrdisterdiń keri áserinen biryńǵaı jahandyq mádenıet qalyptasyp, ártúrliliktiń joıylý qaýpi týyndaýy múmkin. Jyl saıyn jahandanýdan joıylyp ketip jatqan mádenıetter az emes.
«Sondyqtan Ulttyq biregeılikti saqtaý jáne jańǵyrtýǵa erteńin oılaǵan elder ózderiniń mádenı jáne tarıhı erekshelikterin qorǵaýǵa basymdyq beredi. Prezıdentimizdiń bul máselege basymdyq bergeni qýantty.
Gete, Servantes, Konfýsıı ortalyqtary sııaqty Shetelde Abaı (bıyl 180 jyldyq mereıtoıy) ınstıtýttaryn ashýdy qolǵa alý mańyzdy qadam. «Abaı ınstıtýty» negizgi seriktes elderdiń bárinde tól mádenıetimizdi nasıhattaıtyn ortalyq bolýǵa tıis.
Eske salaıyq, Memleket basshysy: «Abaı ınstıtýty» negizgi seriktes elderdiń bárinde tól mádenıetimizdi nasıhattaıtyn ortalyq bolýǵa tıis. Birqatar elde, mysaly, Qytaı, Túrkııa, Mońǵolııa jáne basqa da memleketterde osyndaı ortalyqtar ashylatyn boldy. Syrtqy ister mınıstrligi men «Otandastar» qoryna Mádenıet jáne aqparat mınıstrligimen birlesip, shetelde osyndaı ortalyqtar ashý máselesi boıynsha tıisti jumysty jalǵastyrýdy tapsyramyn», degen edi.
Sondaı-aq, depýtattyń aıtýynsha, bıologııalyq ártúrlilikti saqtaý jónindegi halyqaralyq qor, Ulttyq sıfrlyq arhıv qurý jáne «Qazaqstan balalary» biryńǵaı baǵdarlamasyn iske qosý elimiz úshin strategııalyq mańyzdy jobalar.
«Qazaqstan Táýelsizdiginiń 40 jyldyǵyna ekonomıkalyq jáne ınfraqurylymdyq bastamalar aıqyndaldy. Olar: sıfrlandyrý jáne jasandy ıntellekt, kólik jáne tranzıt, energetıka, agroónerkásip kesheni, adamı kapıtal. Aldaǵy tórt jyl ishinde jyl saıyn 200-ge jýyq ınvestısııalyq jobany iske qosý, 2025-2026 jyldary iri ınfraqurylymdyq jobalardy júzege asyrý, al, bıyl naqty sektordy qarjylandyrýdy eki esege arttyrý (8 trln teńgege deıin), kelesi jyldary 10 trln teńgege jetkizý, Astanadan Arqalyq, Torǵaı, Yrǵyz arqyly ótip, Transkaspıı halyqaralyq kólik dálizine shyǵatyn avtojol salý elimizdegi ekonomıkalyq-ınfraqurylymdyq júzege asyrylatyn jumystardyń bir parasy ǵana. Parlament pen Úkimettiń aldyndaǵy mindet – shekara mańyndaǵy aýmaqtardy damytý týraly jańa zań ázirleý», dep jazǵan senator.
Eske salaıyq, Ulttyq quryltaıda Prezıdent: «Biz úshin eshkim elimizdi damytyp, kórkeıtip bermeıdi. Qazaqstan óz azamattarymyzǵa, ıaǵnı bizge ǵana kerek. Biz óz múmkindigimiz ben kúsh-qýatymyzǵa arqa súıeýimiz qajet. Sondyqtan ult retinde alǵa basýǵa ne kedergi bolsa, sonyń bárinen arylyp, sapaly ult bolýǵa tıispiz», degen edi.
«Qasym-Jomart Kemeluly: «Elimizdi jahanǵa jaıylyp kele jatqan ózgeristerge daıyndap, Qazaqstandy kez kelgen syn-qaterge tótep bere alatyn qýatty memleket etýimiz kerek. Bul – meniń Prezıdent retindegi basty mıssııam. Bul – tutas ultymyzǵa ortaq mańyzdy mindet», ekenin basa aıtty.
Ulttyq quryltaı osylaısha Qazaqstan qoǵamynyń birigýine jáne eldiń uzaq merzimdi damýynyń strategııalyq baǵyttaryn aıqyndaýda basty ról atqarady», dep túıindegen depýtat.
