Uzaq jolǵa shydas beretin joǵary sapaly polıpropılen qaptamalaryna iri kompanııalar tarapynan tapsyrys kóbeıgen. О́ıtkeni ónerkásip taýarynyń tıisti jerine buzylmaı ári búlinbeı jetýi úshin qaptamanyń sapaly ári berik bolǵany abzal. Búginde «FIBC Kazakhstan»-nyń vagon qaptamalaryn «Teńizshevroıl», «Araltuz», «QTJ»-nyń Aqtóbedegi «Batys» fılıaly turaqty tutynady. «Qazhromǵa» qarasty Aqtóbe ferroqorytpa zaýyty da qyzyǵýshylyq tanytyp otyr.
Seriktestik dırektory Botagóz Aıbókenovanyń aıtýynsha, bıyl qańtardan bastap aıyna 100 tonna polıpropılen óńdep, odan sıntetıkalyq materıaldar daıyndaý bastalǵan. Oǵan qajetti túıirshik túrindegi polıpropılen shıkizaty Atyraýdaǵy «KPI» kompanııasynan jetkiziledi.
О́ndiriste túıirshikterdi sıntetıkalyq mataǵa aınaldyrý áldeqaıda tıimdirek. Alaıda óńdeý óndirisin iske qosý qosymsha ǵımarat, jańa qurylǵy jáne jabdyqtarmen jumys isteı alatyn mamandardy qajet etedi. Sondyqtan 2024 jyldyń sońynda «Damý» qory kómegimen 1 mlrd teńge nesıe alyp, oǵan Úndistannan óndiristik mashınalar ákelingen.
«Tapsyrystardyń kóbeıýine baılanysty ónim túrlerin shyǵarýdy arttyrdyq. О́ndiristik aýmaqtan jańa seh ǵımaratyn alyp, onda Úndistannan ákelingen ekstrýder jabdyqtaryn qondyryp jatyrmyz. Byltyr KPI-men áriptestik baılanys ornatyp, ol jaqtan shıkizat kúıinde ákelinetin ónimdi ózimizde óńdeıtin bolyp sheshkenbiz. Alaıda bizde polıpropılen túıirshikterin qalypqa salyp, eritip, laıyqty pishinde mata daıyndaıtyn, ekstrýder mashınalaryn basqaratyn jáne sılındr, konýs pishindes aınalmaly bólshekterdi daıyndaıtyn maman bolmady. Ekstrýder mamanyn Aqtóbedegi kásiptik-tehnıkalyq oqý oryndarynan taba almadyq. Aýyr mashınalarda jumys isteıtin tiginshiler de kerek. Polımer, plastık, rezeńke materıaldardy qyzdyryp, arnaıy qalyptardan ótkizetin ekstrýder mashınasynyń mamany qondyrǵyny baqylap, ónim daıyndalyp jatqanda temperatýra, qysym, jyldamdyǵyn retteıdi. Daıyn ónimniń sapasy men birkelki bolýyn, qajetti ólshemge saı ekenin tekseredi. Qondyrǵynyń aqaýyn anyqtap, jóndeý jumysymen de aınalysady. Osy jumyspen tehnıkalyq daıyndyqtan ótken mamandar aınalysady», deıdi B.Qydyrbaıqyzy.
Tigin sehynyń aǵa sheberi Rýslan Súleımenovtiń aıtýynsha, tiginshiler bir táýlikte 1-2,5 tonna sıntetıkalyq materıaldan 2 myń dana qapshyq tigedi. Keıde eki aýysymmen de jumys isteıdi. Bir aýysymda vagon qaptamasyn tigýge 34 sheber, qapshyq tigýge 70 tiginshi kirisedi. Jańa qondyrǵylardy ornatyp bolǵan soń jumys kólemi artpaq.
Aqtóbe oblysy
