Keshendi bastamalardy júzege asyrý talqylandy

Senat tóraǵasy aldymen Ult­tyq quryltaıdyń IV otyrysynda Memleket basshysy aıqyndap bergen mindetterge toqtalyp, ádiletti jáne qýatty Qazaqstan qurý ıdeıasyn iske asyrýǵa qajetti zańnamalyq jumystyń baǵyt-baǵdaryna nazar aýdardy.

«Ulttyq quryltaıdyń tórtin­shi otyrysynda Prezıdent Qasym-Jomart Toqaev elimizdi odan ári damytý jolyndaǵy birqatar mindetti aıqyndap berdi. Jıyn barysynda qoǵamdy alańdatyp otyrǵan ózekti máseleler ashyq talqylanyp, syndarly pikirler aıtyldy. Parlament qabyldaýǵa tıis zańnamalyq ózgeristerdiń baǵyttary aıqyndaldy. Jalpy, jyl saıyn quryltaıdyń máni artyp, mazmuny keńeıip keledi. Bıyl kóterilgen aýqymdy máse­leler men belgilengen ma­ńyz­dy mindetter soǵan dálel. Parlamenttiń aldynda turǵan endigi mindet – Memleket basshy­synyń Ádiletti, Qaýipsiz, Taza jáne Qýatty Qazaqstan qurý ıdeıa­syn oryndaý úshin qolǵa alyn­ǵan keshendi bastamalaryn júze­ge asyrýǵa qajetti zańnama­­lyq baza qalyptastyrý. Sondyq­tan osy baǵyttaǵy jumysymyzdy júıelep, palatanyń is-sharalar josparyn ózektendirýdiń mańyzy zor», dedi M.Áshimbaev.

Sondaı-aq otyrys barysynda senatorlar komıtetterdiń óńir­ler­degi ózekti máselelerdi sheshýge arnal­ǵan aldaǵy otyrystarynda jáne depýtattardyń múddeli taraptarmen kóshpeli kezdesý­lerinde qozǵalatyn taqyryptar­dy talqylady. Olardyń qataryn­da ekstremızm men terrorızmge qarsy is-qımyl jáne eldegi oıyn bıznesi men lotereıa qyzmeti bo­ıynsha qabyldanǵan zańnama­lyq ózgeristerdiń qoldanys­taǵy tá­jirıbesin talqylaý sııaq­ty máse­leler bar. Odan bólek, Senat depý­tattary osy aptada Aýyl sharýa­shylyǵy mınıstrligi men Sıfrlyq damý, ınnovasııalar jáne aeroǵarysh ónerkásibi mınıstrliginiń basshylyǵymen birlesip, agroónerkásiptik keshendi sıfrlandyrý tetikterine qatysty basymdyqtardy talqylaıdy.

M.Áshimbaev atap ótkendeı, Memleket basshysy sıfrlandyrý isine basa mán berip otyr. Sebebi bul el ekonomıkasynyń qarqyndy damýyna tikeleı áser etedi. Agroónerkásiptik keshendi sıfrlandyrý aýyl sharýashylyǵy óndirisiniń ónimdiligin ulǵaıtyp qana qoımaı, onyń básekege qabi­lettiligin, óndiris kólemin jáne eksporttyq áleýetin arttyrýǵa da jaǵdaı jasaıtyny sóz boldy.

Sonymen qatar bıýro múshe­leri «Táýelsiz Memleketter Dostas­ty­ǵyna qatysýshy memle­ketterdiń sybaılas jemqorlyqqa qarsy is-qımyldaǵy yntymaqtastyǵy týraly kelisimdi ratıfıkasııalaý týraly» zańdy aldaǵy otyrystyń kún tártibinde qaraý úshin tıisti qaýly qabyldady. Kelisimniń maqsaty – sybaılas jemqorlyqqa qarsy is-qımyl salasyndaǵy ulttyq kúsh-jiger men yntymaqtastyqtyń tıimdiligin arttyrý. Zań normalary birlesken baǵdarlamalar men sybaılas jemqorlyqqa qar­sy is-sharalardy ázirleý jáne iske asyrýmen birge sybaılas jemqor­lyq­qa qarsy is-qımyl jáne zańna­many úılestirý salasyndaǵy ynty­maqtastyqtyń quqyqtyq bazasyn jetildirýdi kózdeıdi. Atap aıtqanda, bul aqparat almasýdy qamta­masyz etý jáne sybaılas jem­qor­lyqqa qarsy aǵartýdy kúsheı­tý úshin taraptardyń kúsh-ji­gerin biriktirý sııaqty másele­lerdi qamtıdy.

Buǵan qosa bıýroda osyǵan deıin Májilis qabyldaǵan zańdar jumys úshin Senattyń turaqty komıtetterine bólinip berildi.