Sýret: ernur.kz
Naýryz merekesi qarsańynda oblys ortalyǵynyń ár jerinde merekege arnalǵan túrli is-shara bastaldy. Sonyń biri halyq «Turmystyq úı» atap ketken saýda ortalyǵynda ulttyq kıim kórmesi boldy.
Batys Qazaqstan oblystyq halyq shyǵarmashylyǵy ortalyǵy uıymdastyrǵan bul kórme teatrlandyrylǵan kórinis sıpatynda erekshe ótti. «Dástúr taǵylymy» atty kórmeni biz halyqtyń dástúrli mádenıetine nazar aýdartyp, ulttyq kıimniń qundylyǵyn dáripteýdi maqsat etkendikten uıymdastyrdyq», deıdi mekeme basshysy Máýlet Jubatov.
«Naýryz meıramyn toılaýdyń jańa tujyrymdamasy negizinde 18 naýryz – Ulttyq kıim kúni bolyp belgilengen bolatyn. Osyǵan oraı Ulystyń uly kúni qarsańynda qazaq halqynyń sanǵasyrlyq tarıhy men mádenıetin aıshyqtaıtyn ulttyq kıimderiniń sán kórsetilimi saltanat quryp otyr. Bul is-sharanyń ıdeologııalyq mańyzy óte zor. Ulttyq kıim Naýryzda ǵana emes, kúndelikti ómirde de qoldanysqa ense, nur ústine nur bolar edi», deıdi oblystyq qoǵamdyq damý basqarmasy basshysynyń orynbasary Gúljanar Shókeeva.
Bul kúni saýda ortalyǵyna kelgen halyq «Aqjaıyq» bı ansambli oryndaǵan «Shashý» bıin tamashalap, «Shejire sáni» ata-ájeler toby usynǵan qazaqtyń kóneden kele jatqan kıim úlgilerin tamashalady. Merekege «Atameken» kompozısııalyq ortalyǵynyń «Sáýlem-aı» ájeler ansambli «Aq kımeshek» atty toptamamen, BQO dızaınerler qaýymdastyǵynyń «Qazaqy naqysh» toptamasy, «Marııa hanym» sán salonynyń «Balalar toptamasy», qazaq jigitterine arnalǵan «Qaısar rýh» kıim úlgisi, jas jubaılar úshin «Jar-jar» toptamasy qatysty.
Batys Qazaqstan oblysy
