Sýret: ognialatau.kz
Qalanyń aýqymdylyǵyn eskere otyryp, merekelik is-sharalar birden eki shaǵyn aýdanda – Yntymaq pen Jetigende qatar uıymdastyryldy. Mundaǵy maqsat – árbir turǵynnyń osy shýaqty merekeniń atmosferasyn sezinýine múmkindik berý. Ár shaǵyn aýdanda kıiz úıler tigilip, kelgen qonaqtarǵa dástúrli taǵamdar tegin usynyldy.
Merekelik kóńil kúıdi tanymal ártister men jergilikti shyǵarmashylyq ujymdardyń óner kórsetýleri tolyqtyrdy. Sahnada 5 mýzykalyq ansambl, 5 jeke oryndaýshy, 3 bı toby, sondaı-aq dástúrli qazaq kúılerin oryndaǵan 150 dombyrashydan quralǵan ansambl óner kórsetti. Qonaqtar halyq mýzykasy men bılerdi tamashalap, jastar úshin arnaıy uıymdastyrylǵan 7 sporttyq jarys pen 4 dástúrli qolóner sheberlik dárisine qatysty.
Merekeniń mańyzdy bóligi retinde qazaq halqynyń baı mádenı murasyn aıshyqtaıtyn dástúrli rásimder usynyldy. Ultymyzdyń urpaǵyna mıras bolǵan tusaýkeser, besikke salý, qyz uzatý, basqa da ulttyq boıaýy qanyq rásimder aq bata, án-kúımen órnekteldi.
Merekeniń eń áserli oqıǵalarynyń biri dástúrli qazaq oıyny – «Qoı kóterý» boldy. Bul saıysta 20 kúsh ıesi shydamdylyq pen tózimdilikte synaldy. Jeńimpaz 45 kılolyq qoshqardy 3 mınýt 18 sekýnd boıy kóterip turdy.
Jańa jylymen jurtshylyqty Alataý qalasynyń ákimi Árken Ýtenov quttyqtady. «Qalamyzda alǵash ret uıymdastyrylǵan Naýryz merekesi birlik pen dostyqtyń sımvolyna aınaldy. Kóktemgi jańarý ár úıge beıbitshilik, baqyt jáne amandyq ákelsin», degen izgi lebizin bildirdi.
Naýryz qarsańynda qalada aýqymdy senbilik uıymdastyrylyp, oǵan 1000-nan astam turǵyn belsendi qatysqan bolatyn. Birlesken kúsh-jigerdiń arqasynda jalpy aýdany 25 gektar aýmaq qoqystan tazartylyp, kórkeıtildi.
Almaty oblysy,
Alataý qalasy
