Sýretti túsirgen – Valerıı BÝGAEV
Kúnniń kúrt jylynýy erigen qar sýynan paıda bolatyn alǵashqy qaýip kózderin ańǵartty. Máselen, kúni keshe Astana men Pavlodar qalalarynyń arasyn jalǵaıtyn avtobannyń ústinen qarǵyn sý júrip ketti. Saldarynan kúre joldyń Shiderti kenti aýmaǵynda kólik qozǵalysynda biraz qıyndyq týyndap, joldaǵy sý basqan aýmaqtyń kólemi 150 metrge deıin jetti. «QazAvtoJol» JShS-nyń ókilderi jol boıyna ınertti materıaldar men qum toltyrylǵan qapshyqtar tósep, tasqynnyń ári qaraı jaıylýyna jol bergen joq. Atalǵan aýmaqta sý ótkizetin qubyr ornalasqan. Biraq lap qoıǵan sý qubyrdan ótip úlgermegen. Jolǵa jaýapty kásiporyn, mamandar jaǵdaıdy turaqty baqylaýda ustap otyr, qozǵalys qaýipsizdigin qamtamasyz etetin barlyq qajetti sharalardy atqaryp jatyr.
Oblys ákiminiń baspasóz qyzmeti Baıanaýyl aýdanynda jeti eldi mekendi sý basý qaýpi bar ekenin habarlady. «Aqjar» bógeti, sondaı-aq óńirdegi Ashysý, Aıdos, Bala Shiderti, Qarasý ózenderi qatty tasysa, birqatar aýylǵa sý kirýi yqtımal. Búginde Baıanaýyl aýdanyndaǵy qardyń qalyńdyǵy 21 santımetr, bul ótken jylmen salystyrǵanda 8 santımetrge kóp. Kóktemgi kezeńde Ashysý, Aıdos, Bala Shiderti, Qarasý ózenderi aıtarlyqtaı qaýip tóndiredi. Sý deńgeıiniń kúrt kóterilýi taýlardaǵy qardyń erýine, Qaraǵandy oblysynan Qarasý ózeniniń saǵasy boıymen aǵyp keletin sýlardyń qozǵalysyna baılanysty. Mamandar Ashysý bógetiniń jaǵdaıyn tekserip shyqqan. Buǵan deıin ony nyǵaıtý, bıiktigin kóterýge qatysty jumys júrgizilgen. 1,6 km bógettiń syrtqy jaqtary gabıondarmen nyǵaıtyldy. Baıanaýyl Qaraǵandy oblysymen shekaralas, negizgi qaýip te jyl saıyn sol jaqtan tónedi.
– Qaraǵandy oblysynyń Buqar jyraý aýdany men Baıanaýyl aýdany Sátbaev aýyldyq okrýginiń shekara mańy aýmaǵynda jınalǵan qardyń úlken qory qarqyndy erigen kezde, sondaı-aq «Aqjar» bógeti tolyp, sý jiberilgen jaǵdaıda aýdannyń 7 eldi mekenin sý basý qaýpi bar. «Aqjar» bógetinen aǵyp keletin sýdyń negizgi arnasy Q.Sátbaev aýylynan 10-15 km jerde «Qaratoqa» bógetinen aǵyp keletin sýdyń arnasymen qosylady, osyǵan baılanysty jaqyn mańdaǵy Máshhúr Júsip, Jańatilek, Kókdombaq, Qanysh Sátbaev, Musa Shormanuly aýyldarynyń mańynda gıdroposttar jabdyqtalǵan. Áýeden barlaýdyń nátıjesinde, Qaraǵandy oblysynyń «Aqjar» bógetindegi jaǵdaıǵa monıtorıng júrgizildi. Jobalyq kólemi 4,2 mln tekshe metrdi quraıtyn sý qoımasy qazirde 71%-ǵa tolǵan. «Qaratoqa» bógeti Buqar jyraý aýylynan 25 km qashyqtyqta ornalasqan. 3 mln tekshe metr sý sııatyn bóget búginde 33% tolǵan, – dep habarlady oblys ákiminiń baspasóz qyzmeti.
«Qazgıdromet» RMK Pavlodar oblysy boıynsha fılıalynyń derekterine súıensek, óńirdiń barlyq aýmaǵynda kúzgi kezeńde túsken jaýyn-shashynnyń mólsheri normadan artyq. Ertis ózeniniń gıdroposttarynda muzdyń áli de qatyp jatqany baıqalady. Mamandardyń boljamynsha, oblys aýmaǵyndaǵy sý tasqyny kezeńi eki kezeńde ótedi: naýryzdyń 2-3-onkúndiginde qar erıdi, sáýirdiń 2-3-onkúndiginde Joǵarǵy Ertis kaskadynan sý jiberiledi.
Pavlodar oblysy
