Naýryz merekesi qarsańynda baspanaly bolǵan turǵyndarǵa páter kiltin Batys Qazaqstan oblysynyń ákimi Narıman Tóreǵalıev tabys etti. О́ńir basshysy qonystoı ıelerin merekemen quttyqtap, azamattardy qoljetimdi baspanamen qamtamasyz etý Memleket basshysy Qasym-Jomart Toqaev qoıǵan negizgi mindettiń biri ekenin atap ótti.
Oblys ákimi baspasóz qyzmetiniń dereginshe, 2024 jyly Oral qalasynda bıýdjet esebinen 628 páterlik bes kópqabatty turǵyn úı paıdalanýǵa berilgen. Sonymen birge aýyldyq jerlerde 805 turǵyn úı satyp alynyp, turǵyndarǵa tabystalǵan. Oǵan qosa byltyrǵy sý tasqynynan zardap shekkender úshin 900 úı jańadan salynyp, 2 myńnan astam páter satyp alyp berilgen.
N.Tóreǵalıev bıyl oblysta 19 kópqabatty turǵyn úıdiń qurylysy aıaqtalatynyn, bul taǵy 950 otbasyny baspanamen qamtamasyz etetinin aıtty. Budan bólek, respýblıkalyq bıýdjet esebinen áleýmettik osal toptaǵy azamattarǵa 205 páter satyp alý kózdelip otyr.
– Búgin «Aqjaıyq» shaǵyn aýdanynda 120 páterlik jańa úıdi paıdalanýǵa berip jatyrmyz. Bul Naýryz meıramy qarsańynda jerlesterimiz úshin úlken qýanysh. Munda barlyǵy 25 kópqabatty turǵyn úı salý josparlanǵan. Qazirgi ýaqytta onyń segiziniń qurylysy aıaqtaldy. Jalpy, jyl sońyna deıin bıýdjet qarajaty esebinen 1500-den astam páter paıdalanýǵa beriledi. Sondaı-aq úıleri qaýipti dep tanylǵan turǵyndarǵa 180 páter satyp alamyz, – dedi N.Tóreǵalıev.
Oral qalasynyń kúnbatysynda boı kóterip jatqan «Aqjaıyq» shaǵyn aýdany qarqyndy damyp keledi. Munda bilim berý, densaýlyq saqtaý, mádenıet, sport nysandaryn salý da josparlanǵan. 2024 jyldyń sońynda 150 oryndyq zamanaýı ońaltý ortalyǵy paıdalanýǵa berildi. Bolashaqta da halyqtyń ómir sapasyn arttyrýǵa baǵyttalǵan jańa áleýmettik mańyzy bar nysandardyń qurylysy qolǵa alynbaq. Taıaýda jańa shaǵyn aýdandy qalanyń ózge bóligimen jalǵaıtyn jańa avtobýs baǵyty iske qosyldy.
Batys Qazaqstan oblysy
