Otandyq startap álemdik naryqqa shyqty

Qosymshanyń negizgi erek­sheligi – oqý, bilim, oıyn-saýyq salasynda paıdalanýshylarǵa qolaıly múmkindikter usyný. Mysaly, qoldanýshylar tarıhı tulǵalardyń sıfrlyq egizderin jasap, vırtýaldy suhbat qura alady. Eınshteınmen fızıka jóninde pikir almasyp, belgili jazýshy nemese ǵalymmen áńgime-dúken qurý múmkindigi bar. Sonymen qatar sýretter generasııalaý, mátin jazý, esse qurastyrý sııaqty fýnksııalarmen jabdyqtalǵan. «GoatChat.AI» qosymshasynda aqyly jáne tegin qyzmet túrleri qarastyrylǵan. Tegin nusqada shekteýli múmkindikter usynylsa, aqyly nusqada paıdalanýshylar qosymshanyń barlyq fýnksııasyn tolyq ári shekteýsiz qoldana alady. Máselen, AQSh-ta aptalyq jazylym – 9,99 dollar, aılyq jazylym – 24,99 dollar, al jyldyq jazylym quny – 99,99 dollar.

Jaqynda «GoatChat.AI» jobasyn Ispanııanyń iri medıaholdıngi «Newry Global Media» satyp aldy. Bul týraly «GoatChat.AI» star­tabynyń negizin qalaýshylardyń biri ári bas dırektory Baqytjan Dos «Facebook» áleýmettik jelisinde habarlady.

«Búgin bizdiń kompanııa tanymal «AI» qosymshasy «GoatChat.AI» startabyn ıspandyq «Newry Global Media» medıaholdıngine satqanyn resmı túrde habarlaıdy. Qosymsha 52 apta boıy eýropalyq «App Store» charttarynda úzdik úshtikte turaqtap, 9 mıllıon ret júktelgen», dep jazdy Baqytjan Dos.

Sondaı-aq bul mámile týraly «MOST Ventures» qorynyń basqarýshy seriktesi Álim Hamıtov túsinikteme berdi. Qor buǵan deıin «Adaptive Plus» kompanııasyna ınvestısııa salǵan bolatyn.

«Adaptive Plus» kompanııasy óziniń tanymal «AI»-qosymshasy «GoatChat.AI»-dy ıspandyq «Newry Global Media» medıaholdıngine satty. 2021 jyly qurylǵan «Goat­Chat.AI» qosymshasy stýdentterge oqý barysynda tapsyrmalar men emtıhandarǵa daıyndalýǵa kómektesetin úlken tildik modelder negizinde jumys isteıdi. Sonymen qatar qosymsha sıfrlyq egizderdi («AI Twin») jasaý, arnaıy tusqaǵazdardy generasııalaý, jasandy ıntellekt pen tarıhı tulǵalarmen toptyq chattar sekildi oıyn-saýyq qyzmetterin usynady. Bul qyzmetter ar­qyly qosymsha 9 mıllıon ret júktelip, 52 apta boıy Eýropa «App Store» charttarynyń úzdik bestiginen túspedi. «TechCrunch» basylymynyń derekteri boıynsha álemdegi eń kóp júkteletin ári tabysty «AI»-qosymshalardyń úzdik ondyǵyna kirdi», – deıdi Álim Hamıtov.

Onyń aıtýynsha, Madrıd qa­la­synda ornalasqan «Newry Global Media» kompanııasy sıfr­lyq kontentti qurýǵa, mone­tı­zasııalaýǵa jáne taratýǵa maman­danǵan. Keıingi eki jyl ishinde bul holdıngtiń qosymshalary 520 mıllıon ret júktelip, 5 mıl­lıon jazylýshy jınaǵan. Kom­panııa Afrıka, Azııa, Latyn Ame­rıkasy elderinde óz qyzmetin usynady. «GoatChat.AI» startabyn satyp alý – medıaholdıngtiń jahandyq na­ryqtaǵy ustanymyn kúsheıtýge arnalǵan strategııalyq qadam.

«GoatChat.AI» startabynyń negizin qalaýshylardyń biri Erbol Kópjasar startaptyń qalaı paıda bolǵanyn aıtyp berdi.

«16 jasymda Ulybrıtanııa­daǵy Nıýkasl ýnıversıtetine oqý­ǵa tústim. Oqýymdy joǵary úl­ge­rimmen tegin jalǵastyr­dym. Ýnı­­versıtetti aıaqtaıtyn kez­de mes­send­jerlerdiń birinde baǵ­dar­­la­mashy bolyp jumys istep júr­­dim. Keıin Qazaqstanǵa oraldym. «nFactorial»-da mentor bolyp jumys istep, memlekettik sek­tor­dyń qalaı jumys isteıtinin kó­rý maq­satynda «Astana» halyq­ara­lyq qarjy ortalyǵyna ornalas­tym. Sonymen qatar túrli tapsyrys­tar alyp otyrdym, alaıda ózim baǵ­dar­lamalaýdan sharshap, menedjer­likke bet burdym», deıdi Erbol.

Baqytjan Dospen tanysyp, onymen bir jyl Máskeýde lıýks kólikterdi jalǵa beretin qosymsha jasaý jobasynda jumys istegennen keıin, elge oralyp, óz jobalaryn qolǵa alǵan.

«GoatChat.AI» jobasy kezekti áńgime barysynda dúnıege kelgen. «Goat» ataýyn tańdap, adam jasandy ıntellektpen áńgimelese alsa, áıgili tarıhı tulǵalarmen de sóılese alýy kerek degen ıdeıany júzege asyrǵan. Keıinirek jobanyń fýnksıonaly keńeıtilip, sıfrlyq egizderdi jasaý qyzmeti qosylady.

Erbol Kópjasardyń aıtýynsha, qoldanýshy chat-botqa qajetti aqparatty engizip, onyń kez kelgen suraqqa jaýap berýin qamtamasyz ete alady. «Mysaly, qarjylyq saýat­tylyq boıynsha suraqtarǵa jaýap beretin sıfrlyq egizderdi jasaýǵa bolady. Bir qyzyǵy, paıdalanýshylar qarapaıym onlaın-assıstentke qaraǵanda, sıfrlyq egizdermen sóıleskende jıi sálem­desip, alǵys aıtady», deıdi ol.

Qazirgi ýaqytta mámileniń qar­jy­lyq jaǵy jarııalanǵan joq. Degen­men buǵan deıin «GoatChat.AI» startaby 1,2 mıllıon dollar ınvestısııa tartyp úlgergen. Qar­jylandyrýǵa 500 «Startups», «MOST Ventures» jáne Murat Ábdirah­manov qatysqan. Buǵan de­ıingi suhbatynda Erbol Kópjasar star­taptyń kelesi ınvestısııalyq raýndta 30 mıllıon dollar tartýdy kózdeıtinin aıtqan edi.